มุจฺจเต สตฺตุสมฺพาธา สุลสา สตฺตุกามิวาติ ฯ

ตตฺถ ปณฺฑิตา โหตีติ อิตฺถีปิ ปณฺฑิตา ตตฺถ ตตฺถ วิจกฺขณา โหติ ฯ อถวา อิตฺถีปิ ปณฺฑิตา เจว ตตฺถ ตตฺถ วิจกฺขณา จ โหติ ฯ ลหุมตฺถํ วิจินฺติกาติ ลหุขิปฺปํ อตฺถํ วิจินฺติกา ฯ ลหุญฺจ วตาติ อทนฺธญฺจ วต ฯ ขิปฺปญจาติ อจิเรน จ ฯ นิกฏฺเฐ สมเจตยีติ สนฺติเก ฐิตาว ตสฺส มารณุปายํ จินฺเตสิ ฯ ปุณฺณายตเนวาติ ปูริตธนุสฺมึ ฯ อิทํ วุตฺตํ โหติ ยถา เฉโก มิคลุทฺธโก อากิณฺณปุณฺเณ ธนุสฺมึ ขิปฺปํ มิคํ วธติ เอวํ สุลสา สตฺตุกํ วธีติ ฯ โยธาติ โย อิมสฺมึ สตฺตโลเก ฯ นิพฺโพธตีติ ชานาติ ฯ สตฺตุกามิวาติ สตฺตุกา อิว ยถา สุลสา มุตฺตา เอวํ มุจฺจตีติ อตฺโถ ฯ

อิติ สุลสา โจรํ วธิตฺวา ปพฺพตา โอรุยฺห อตฺตโน ปริชนสฺส สนฺติกํ คนฺตฺวา อยฺยปุตฺโต กหนฺติ ปุฏฺฐา มา ตํ ปุจฺฉิตฺถาติ วตฺวา รถํ อภิรูหิตฺวา นครเมว ปาวิสิ ฯ

สตฺถา อิมํ ธมฺมเทสนํ อาหริตฺวา ชาตกํ สโมธาเนสิ ตทา เต อุโภ อิเมเยว อเหสุํ เทวตา ปน อหเมวาติ ฯ