ตตฺถ อเปกฺขิยานาติ อเปกฺขิตฺวา ชานิตฺวา ฯ อิทํ วุตฺตํ โหติ ตาต ปฐวิสฺสโร ราชา นาม อหํ ภุสํ กุทฺโธ พลวโกธาภิภูโตติ ญตฺวา อฏฺฐวตฺถุกาทิเภทํ ทณฺฑํ ปรสฺส น ปเนยฺย น ปวตฺเตยฺย กึการณา กุทฺโธ หิ อฏฺฐวตฺถุกํ โสฬสวตฺถุกํ กตฺวา อฏฺฐาเนน อการเณน อตฺตโน ราชภาวสฺส อนนุรูปํ อิมํ เอตฺตกํ นาม อาหราเปถ อิทํ วาสฺส กโรถาติ ปรสฺส ภุสํ ทุกฺขานิ พลวทุกฺขานิ อุทีเรยฺย ฯ ยโตติ ยทา ฯ อิทํ วุตฺตํ โหติ ยทา ปน ราชา ปรสฺมึ อุปฺปนฺนํ อตฺตโน ปสาทํ ชาเนยฺย อถ ปรสฺส ทุกฺกฏํ อตฺถํ นิยุญฺเชยฺย อุปปริกฺเขยฺย ตทา เอวํ นิยุญฺชนฺโต อยํ นาเมตฺถ อตฺโถ อยเมว ตสฺส โทโสติ สยํ อตฺตปจฺจกฺขํ กตฺวา อถสฺส อปราธการกสฺส อฏฺฐวตฺถุกเหตุ อฏฺเฐว โสฬส- วตฺถุกเหตุ โสฬเสว กหาปเณ คณฺหนฺโต ทณฺฑํ สทิสํ กตโทสานุรูปํ นิเวสเย ฐเปยฺย ปวตฺเตยฺยาติ ฯ อมุจฺฉิโตติ ฉนฺทาทิวเสน อคติกิเลเสหิ อมุจฺฉิโต อนภิภูโต หุตฺวา โย นยานยํ นยติ อุปปริกฺขติ โส เนว ปรํ ฌาเปติ น อตฺตานํ ฯ ฉนฺทาทิวเสน หิ อเหตุกํ ทณฺฑํ ปวตฺเตนฺโต ปรมฺปิ เตน ทณฺเฑน ฌาเปติ ฑหติ ปีเฬติ อตฺตานมฺปิ ตโตนิทาเนน ปาเปน อยํ ปเนวํ ปรํ ฌาเปติ อตฺตานํ ฯ โย ทณฺฑธโร ภวตีธ อิสฺสโรติ โย อิธ ปฐวิสฺสโร ชาโต อิธ สตฺตโลเก โทสานุจฺฉวิกํ ทณฺฑํ ปวตฺเตนฺโต ทณฺฑธโร โหติ ฯ ส วณฺณคุตฺโตติ คุณวณฺเณน เจว ยสวณฺเณน จ คุตฺโต รกฺขิโต สิริยา น ธํสติ น ปริหายติ ฯ อวณฺณสํยุตฺตาว ชหนฺตีติ อธมฺมิกา โลลราชาโน อวณฺเณน ยุตฺตา หุตฺวา ชีวิตํ ชหนฺติ ฯ ธมฺเม จ เย อริยปฺปเวทิเตติ เย ราชาโน อาจารอริเยหิ ธมฺมิกราชูหิ ปเวทิเต ทสวิเธ ราชธมฺเม รตา ฯ อนุตฺตรา เตติ เต วจสา มนสา กมฺมุนา จ ตีหิปิ เอเตหิ อนุตฺตรา เชฏฺฐกา ฯ เต สนฺติโสรจฺจสมาธิสณฺฐิตาติ เต อคติปหาเนน กิเลสสนฺติยญฺจ สุสีลยสงฺขาเต โสรจฺเจ จ เอกคฺคตาสมาธิมฺหิ จ สณฺฐิตา ปติฏฺฐิตา ธมฺมิกราชาโน ฯ วชนฺติ โลกํ ทุภยนฺติ ธมฺเมน รชฺชํ กาเรตฺวา มนุสฺสโลกโต เทวโลกํ เทวโลกโต มนุสฺสโลกนฺติ อุภยโลกเมว วชนฺติ นิรยาทีสุ น นิพฺพตฺตนฺติ ฯ นรปมุทานนฺติ นรานญฺจ ปมุทานญฺจ ฯ ฐเปมิ อตฺตานนฺติ กุทฺโธปิ โกธวเสน อคนฺตฺวา อตฺตานํ โปราณกราชูหิ ฐปิตนยสฺมึเยว ฐเปมิ วินิจฺฉยธมฺมํ น ภินฺทามิ ฯ

เอวํ ฉหิ คาถาหิ รญฺญา อตฺตโน คุเณ กถิเต สพฺพาปิ ราชปริสา ตุฏฺฐา อยํ สีลาจารคุณสมฺปตฺติ อมฺหากญฺเญว อนุรูปาติ รญฺโญ คุณํ กถยึสุ ฯ สุมงฺคโล ปน ปริสาย กถิตาวสาเน อุฏฺฐาย ราชานํ วนฺทิตฺวา อญฺชลึ ปคฺคยฺห รญฺโญ ถุตึ กโรนฺโต ติสฺโส คาถา อภาสิ