นามํ ฯ โส เจติยรฏฺเฐ โสตฺถิยนคเร รชฺชํ กาเรสิ จตูหิ อิทฺธีหิ สมนฺนาคโต อโหสิ อุปริจโร โหติ อากาสคามี จตฺตาโร เทวปุตฺตา จตูสุปิ ทิสาสุ ขคฺคหตฺถา รกฺขนฺติ กายโต จนฺทนคนฺโธ วายติ มุขโต อุปฺปลคนฺโธ ฯ ตสฺส กปิโล นาม พฺราหฺมโณ ปุโรหิโต อโหสิ ฯ กปิลพฺราหฺมณสฺส ปน กนิฏฺโฐ โกรกลมฺพโก นาม รญฺญา สทฺธึ เอกาจริยกุเล อุคฺคหิตสิปฺโป พาลสหาโย ฯ ตสฺส กุมารกาเลเยว อหํ รชฺชํ ปตฺวา ตุยฺหํ ปุโรหิตฏฺฐานํ ทสฺสามีติ ปฏิชานิ ฯ โส รชฺชํ ปตฺวา ปิตุ ปุโรหิตํ กปิลพฺราหฺมณํ ปุโรหิตฏฺฐานโต จาเวตุํ นาสกฺขิ ฯ ปุโรหิเต ปน อตฺตโน อุปฏฺฐานํ อาคจฺฉนฺเต ตสฺมึ คารเวน อปจิตาการํ ทสฺเสติ ฯ พฺราหฺมโณ ตํ สลฺลกฺเขตฺวา รชฺชํ นาม สมวเยหิ สทฺธึ สุปริหารํ โหติ อหํ ราชานํ อาปุจฺฉิตฺวา ปพฺพชิสฺสามีติ จินฺเตตฺวา เทว อหํ มหลฺลโก เคเห กุมาโร อตฺถิ ตํ ปุโรหิตํ กโรหิ อหํ ปพฺพชิสฺสามีติ ราชานํ อนุชานาเปตฺวา ปุตฺตํ ปุโรหิตฏฺฐาเน ฐเปตฺวา ราชุยฺยานํ ปวิสิตฺวา อิสิปพฺพชฺชํ ปพฺพชิตฺวา ฌานาภิญฺญา นิพฺพตฺเตตฺวา ปุตฺตํ อุปนิสฺสาย ตตฺเถว วาสํ กปฺเปสิ ฯ โกรกลมฺพโก อยํ ปพฺพชนฺโตปิ มยฺหํ ฐานนฺตรํ น ทาเปสีติ ภาตริ อาฆาตํ พนฺธิตฺวา เอกทิวสํ สุขกถาย สมเย รญฺญา โกรกลมฺพก ตฺวํ ปุโรหิตฏฺฐานํ น กโรสีติ วุตฺเต อาม เทว น กโรมิ ภาตา เม กโรตีติ อาห ฯ นนุ เต ภาตา ปพฺพชิโตติ ฯ อาม ปพฺพชิโต ฐานนฺตรํ ปน ปุตฺตสฺส ทาเปสีติ ฯ เตนหิ ตฺวํ กาเรหิ ฯ เทว ปเวณิยา อาคตฐานนฺตรา ภาตรํ อปเนตฺวา น สกฺกา มยา กาเรตุนฺติ ฯ เอวํ สนฺเต อหํ ตํ มหลฺลกํ กตฺวา ภาตรนฺเต กนิฏฺฐํ กริสฺสามีติ ฯ กถํ เทวาติ ฯ มุสาวาทํ กตฺวาติ ฯ กึ เทว น ชานาถ ยทา มม ภาตา มหนฺเตน อพฺภูตธมฺเมน สมนฺนาคโต วิชฺชาธโร โส อภูเตน ตุมฺเห วญฺเจสฺสติ จตฺตาโร เทวปุตฺเต อนฺตรหิเต วิย กริสฺสติ กายโต จ มุขโต จ สุคนฺธํ ทุคฺคนฺธํ วิย กริสฺสติ ตุมฺเห อากาสา โอตาเรตฺวา ภูมิยํ ฐิเต วิย กริสฺสติ ตุมฺเห ปฐวิยํ ปวิสนฺตา วิย ภวิสฺสถ ตทา ตุมฺเห กถาย ปติฏฺฐาตุํ นาสกฺขิสฺสถาติ ฯ ตฺวํ เอวํ สญฺญํ มา กริ อหํ กาตุํ สกฺขิสฺสามีติ ฯ กทา กริสฺสถ เทวาติ ฯ อิโต สตฺตเม ทิวเสติ ฯ สา กถา สกลนคเร ปากฏา อโหสิ ฯ ราชา กิร มุสาวาทํ กตฺวา ขุทฺทกํ มหลฺลกํ กริสฺสติ ฐานนฺตรํ ขุทฺทกสฺส ทาเปสฺสติ กีทิโส นุ โข มุสาวาโท นาม กึ นีลโก อุทาหุ ปีตกาทีสุ อญฺญตรวณฺโณติ เอวํ มหาชนสฺส ปริวิตกฺโก อุทปาทิ ฯ ตทา กิร โลกสฺส สจฺจวาทิกาเล มุสาวาโท นาม เอวรูโปติ น ชานนฺติ ฯ ปุโรหิตปุตฺโตปิ ตํ กถํ สุตฺวา คนฺตฺวา ปิตุ กเถสิ ตาต ราชา กิร มุสาวาทํ กตฺวา ตุมฺเห ขุทฺทเก กตฺวา อมฺหากํ ฐานนฺตรํ มม จุลฺลปิตุสฺส ทสฺสตีติ ฯ ตาต ราชา มุสาวาทํ กตฺวาปิ อมฺหากํ ฐานนฺตรํ ตสฺส ทาตุํ น สกฺขิสฺสติ กตรทิวเส ปน กริสฺสตีติ ฯ อิโต กิร สตฺตเม ทิวเสติ ฯ เตนหิ ตทา มยฺหํ อาโรเจยฺยาสีติ ฯ สตฺตเม ทิวเส มหาชนา มุสาวาทํ ปสฺสิสฺสามาติ ราชงฺคเณ สนฺนิปติตฺวา มญฺจาติมญฺเจ พนฺธิตฺวา อฏฺฐํสุ ฯ กุมาโร คนฺตฺวา ปิตุ อาโรเจสิ ฯ ราชา อลงฺกตปฏิยตฺโต นิกฺขมิตฺวา มหาชนสฺส มชฺเฌ ราชงฺคเณ อากาเส อฏฺฐาสิ ฯ ตาปโส อากาเสนาคนฺตฺวา รญฺโญ ปุรโต นิสีทนจมฺมํ อตฺถริตฺวา อากาเส ปลฺลงฺเกน นิสีทิตฺวา สจฺจํ กิร ตฺวํ มหาราช มุสาวาทํ กตฺวา ขุทฺทกํ มหลฺลกํ กตฺวา ตสฺส ฐานนฺตรํ ทาตุกาโมสีติ ฯ อาม อาจริย เอวํ เม กถิตนฺติ ฯ อถ นํ โส โอวทนฺโต มหาราช มุสาวาโท นาม ภาริโย คุณปริธํสโก จตูสุ อปาเยสุ นิพฺพตฺตาเปติ ราชา นาม มุสาวาทํ กโรนฺโต ธมฺมํ หนติ โส ธมฺมํ หนิตฺวา สยเมว หญฺญตีติ วตฺวา ปฐมํ คาถมาห