อทุฏฺฐจิตฺโต ภาเสยฺย คิรํ สจฺจูปสญฺหิตนฺติ ฯ

ตตฺถ ส ราชาติ ภิกฺขเว โส เจติโย ราชา ปุพฺเพ อนฺตลิกฺขจโร หุตฺวา ปจฺฉา อิสินา อภิสตฺโต ปริหีนสภาโว หุตฺวา อตฺตปริยายํ อตฺตโน กาลปริยายํ ปตฺวา ปฐวึ ปาวิสีติ อตฺโถ ฯ ตสฺมาติ ยสฺมา เจติยราชา ฉนฺทาทิคมเนน อวีจิปรายโน ชาโต ตสฺมา ฯ อทุฏฺฐจิตฺโตติ ฉนฺทาทีหิ อทูสิตจิตฺโต หุตฺวา สจฺจเมว ภาเสยฺยาติ ฯ

มหาชโน เจติยราชา อิสึ อกฺโกสิตฺวา มุสาวาทํ กตฺวา อวีจึ ปวิฏฺโฐติ ภยปฺปตฺโต อโหสิ ฯ รญฺโญ ปญฺจ ปุตฺตา อาคนฺตฺวา พฺราหฺมณสฺส ปาเทสุ ปติตฺวา อมฺหากํ อวสฺสโย โหหีติ วทึสุ ฯ พฺราหฺมโณ ตาตา ตุมฺหากํ ปิตา ธมฺมํ นาเสตฺวา มุสาวาทํ กตฺวา อิสึ อกฺโกสิตฺวา อวีจึ ปวิสนฺโต ธมฺโม นาเมส หโต หนติ ตุมฺเหหิ น สกฺกา อิธ วสิตุนฺติ วตฺวา เตสุ สพฺพเชฏฺฐกํ เอหิ ตาต ปาจีนทฺวาเรน นิกฺขมิตฺวา อุชุกเมว คจฺฉ คจฺฉนฺโต สพฺพเสตํ สตฺตปฺปติฏฺฐิตํ หตฺถิรตนํ ปสฺสิสฺสสิ ตาย สญฺญาย ตตฺถ นครํ มาเปตฺวา วส ตํ นครํ หตฺถิปุรํ นาม ภวิสฺสตีติ อาห ฯ ทุติยํ อามนฺเตตฺวา ตาต ทกฺขิณทฺวาเรน นิกฺขมิตฺวา อุชุกเมว คจฺฉ คจฺฉนฺโต สพฺพเสตํ อสฺสรตนํ ปสฺสิสฺสสิ ตาย สญฺญาย ตตฺถ นครํ มาเปตฺวา วส ตํ นครํ อสฺสปุรํ นาม ภวิสฺสตีติ อาห ฯ ตติยํ อามนฺเตตฺวา ตาต ปจฺฉิมทฺวาเรน นิกฺขมิตฺวา อุชุกเมว คจฺฉ คจฺฉนฺโต เกสรสีหํ ปสฺสิสฺสสิ ตาย สญฺญาย ตตฺถ นครํ มาเปตฺวา วส ตํ นครํ สีหปุรํ นาม ภวิสฺสตีติ อาห ฯ จตุตฺถํ อามนฺเตตฺวา ตาต อุตฺตรทฺวาเรน นิกฺขมิตฺวา อุชุกเมว คจฺฉ คจฺฉนฺโต สพฺพรตนมยํ จกฺกปญฺชรํ ปสฺสิสฺสสิ ตาย สญฺญาย ตตฺถ นครํ มาเปตฺวา วส ตํ นครํ อุตฺตรปญฺชรํ นาม ภวิสฺสตีติ อาห ฯ ปญฺจมํ อามนฺเตตฺวา ตาต ตยา อิมสฺมึ ฐาเน วสิตุํ น สกฺกา อิมสฺมึ นคเร มหาถูปํ กตฺวา นิกฺขมิตฺวา ปจฺฉิมุตฺตราย ทิสาย อุชุกเมว คจฺฉ คจฺฉนฺโต เทฺว ปพฺพเต อญฺญมญฺญํ ปหริตฺวา ททฺธนฺติ สทฺทํ กโรนฺเต ปสฺสิสฺสสิ ตาย สญฺญาย ตตฺถ นครํ มาเปตฺวา วส ตํ นครํ ททฺธปุรํ นาม ภวิสฺสตีติ อาห ฯ เต ปญฺจปิ ชนา ตาย สญฺญาย คนฺตฺวา ตสฺมึ ตสฺมึ ฐาเน นครานิ มาเปตฺวา วสึสุ ฯ

สตฺถา อิมํ ธมฺมเทสนํ อาหริตฺวา น ภิกฺขเว อิทาเนว ปุพฺเพปิ เทวทตฺโต มุสาวาทํ กตฺวา ปฐวึ ปวิฏฺโฐติ วตฺวา ชาตกํ สโมธาเนสิ ตทา เจติยราชา เทวทตฺโต อโหสิ กปิลพฺราหฺมโณ ปน อหเมวาติ ฯ