สมฺมาสมฺพุทฺโธ อิมํ ธมฺมเทสนํ กเถตฺวา อภิสมฺพุทฺโธว หุตฺวา อิมํ คาถมาห

อิธ เจ นํ วิราเธสิ สทฺธมฺมสฺส นิยามกํ

จิรํ ตฺวํ อนุตปฺเปสิ เสริวายํว พาณิโชติ ฯ

ตตฺถ อิธ เจ นํ วิราเธสิ สทฺธมฺมสฺส นิยามกนฺติ อิมสฺมึ สาสเน เอวํ สทฺธมฺมสฺส นิยามกสงฺขาตํ โสตาปตฺติมคฺคํ วิราเธสิ เจ ยทิ วิราเธสิ วิริยํ โอสฺสชฺชนฺโต นาธิคจฺฉสิ น ปฏิลภสีติ อตฺโถ ฯ จิรํ ตฺวํ อนุตปฺเปสีติ เอวํ สนฺเต ตฺวํ ทีฆมทฺธานํ โสจนฺโต ปริเทวนฺโต สทา อนุตปฺเปสฺสสิ ฯ อถวา โอสฺสฏฺฐวิริยตาย อริยมคฺคสฺส วิราธิตตฺตา ทีฆรตฺตํ นิรยาทีสุ อุปฺปนฺโน นานปฺปการานิ ทุกฺขานิ อนุภวนฺโต อนุตปฺเปสฺสสิ กิลมิสฺสสีติ อยเมตฺถ อตฺโถ ฯ กถํ ฯ เสริวายํว พาณิโชติ เสริวาติ เอวํนามโก อยํ วาณิโช ยถา ฯ อิทํ วุตฺตํ โหติ ยถา ปุพฺเพ เสริวา นาม พาณิโช สตสหสฺสคฺฆนิกํ สุวณฺณปาตึ ลภิตฺวา ตสฺสา คหณตฺถาย วิริยํ อกตฺวา ตโต ปริหีโน อนุตปฺปิ เอวเมว ตฺวํปิ อิมสฺมึ สาสเน ปฏิยตฺตสุวณฺณปาติสทิสํ อริยมคฺคํ โอสฺสฏฺฐวิริยตาย อนธิคจฺฉนฺโต ตโต ปริหีโน ทีฆรตฺตํ อนุตปฺเปสฺสสิ สเจ ปน วิริยํ น โอสฺสชฺชิสฺสสิ ปณฺฑิตวาณิโช สุวณฺณปาตึ ปฏิลภติ วิย มม สาสเน นววิธํปิ โลกุตฺตรธมฺมํ ปฏิลภิสฺสสีติ ฯ