อตีเต เอกสฺมึ กาสีนิคเม เอโก พฺราหฺมณมาณโว อภิรูโป อโหสิ ถามสมฺปนฺโน นาคพโล ฯ โส จินฺเตสิ กิมฺเม กสิกมฺมาทีนิ กตฺวา มาตาปิตุปฏฺเฐหิ กึ ปุตฺตทาเรน กึ ทานาทิปุญฺเญหิ กเตหิ กิญฺจิ อโปเสตฺวา กิญฺจิ ปุญฺญํ อกตฺวา อรญฺญํ ปวิสิตฺวา มิเค มาเรตฺวา อตฺตานเมว โปเสสฺสามีติ โส ปญฺจาวุธสนฺนทฺโธ หิมวนฺตํ คนฺตฺวา นานามิเค วธิตฺวา ขาทนฺโต อนฺโตหิมวนฺเต วิธินิยา นาม นทิยา ตีเร คิริปริกฺขิตฺตํ มหนฺตํ ปพฺพตชาลํ ปตฺวา ตตฺถ มิเค วธิตฺวา องฺคาเร ปกฺกมํสํ ขาทนฺโต วาสํ กปฺเปสิ ฯ โส จินฺเตสิ อหํ สทา ถามสมฺปนฺโน นาม น ภวิสฺสามิ ทุพฺพลกาเล อรญฺเญ จริตุํ นาสกฺขิสฺสามิ อิทาเนว นานาวณฺเณ มิเค ปพฺพตชาลํ ปเวเสตฺวา ทฺวารํ โยเชตฺวา อรญฺญํ อนาหิณฺฑนฺโตว ยถารุจิยา มิคํ วธิตฺวา ขาทิสฺสามีติ ฯ โส ตถา อกาสิ ฯ อถสฺส กาเล อติกฺกนฺเต ตํ กมฺมํ มตฺถกํ ปตฺตํ ทิฏฺฐธมฺมเวทนียํ ชาตํ อตฺตโน หตฺถปาเทหิ น ลภิ คนฺตุํ อปราปรํ ปริวตฺเตตุํ นาสกฺขิ เนว กิญฺจิ ขาทนียํ โภชนียํ น ปานียํ ปิวิ สรีรํ มิลายิ มนุสฺสเปโต อโหสิ คิมฺหกาเล ปฐวี วิย สรีรํ ภิชฺชิตฺวา ราชิโย ทสฺเสสิ ฯ โส ทุรูโป ทุสฺสณฺฐิโต มหาทุกฺขํ อนุภวิ ฯ เอวํ อทฺธาเน คเต สีวิรฏฺเฐ สีวิราชา นาม อรญฺเญ องฺคารปกฺกมํสํ ขาทิสฺสามีติ อมจฺจานํ รชฺชํ นิยฺยาเทตฺวา ปญฺจาวุธสนฺนทฺโธ อรญฺญํ ปวิสิตฺวา มิเค วธิตฺวา มํสํ ขาทนฺโต อนุปุพฺเพน ตํ ปเทสํ ปตฺวา ตํ ปุริสํ ทิสฺวา ภีโต สตึ อุปฏฺฐเปตฺวา โกสิ ตฺวํ อมฺโภ ปุริสาติ ปุจฺฉิ ฯ สามิ มนุสฺสเปโต อหํ อตฺตโน กตกมฺมสฺส ผลํ อนุภวามิ ตฺวํ ปน โกสีติ ฯ สีวิราชาหมสฺมีติ ฯ อถ กสฺมา อิธาคโตสีติ ฯ มิคมํสํ ขาทนตฺถายาติ ฯ อถสฺส โส อหมฺปิ มหาราช อิมินาว การเณนาคนฺตฺวา มนุสฺสเปโต ชาโตติ สพฺพํ วิตฺถาเรน กเถตฺวา อตฺตโน ทุกฺขิตภาวํ รญฺโญ อาจิกฺขนฺโต เสสคาถา อภาสิ

อมิตฺตานํว หตฺถตฺถํ สีวิ ปปฺโปติ มามิว

กมฺมํ วิชฺชญฺจ ทกฺเขยฺยํ วิวาหํ สีลมทฺทวํ

เอเตว ยเส หาเปตฺวา นิพฺพตฺโต เสหิ กมฺเมหิ ฯ