ตตฺถ อมิตฺตานํว หตฺถตฺถนฺติ อมิตฺตานํ หตฺเถ อตฺถํ วินาสํ วิย ฯ สีวีติ ราชานํ อาลปติ ฯ ปปฺโปติ มามิวาติ มาทิโส ปาปกมฺเม ปาปุณาติ อตฺตโนว กมฺเมน วินาสํ ปาปุณาตีติ วุตฺตํ โหติ ฯ กมฺมนฺติ กสิกมฺมาทิเภทํ อาชีวสาธกํ กิจฺจํ ฯ วิชฺชนฺติ นานปฺปการกํ หตฺถิสิปฺปาทิกํ สิปฺปํ ฯ ทกฺเขยฺยนฺติ นานปฺปกาเรน โภคุปฺปาทเนน โกสลฺลํ ฯ วิวาหนฺติ อาวาหวิวาหสมฺพทฺธํ ฯ สีลมทฺทวนฺติ ปญฺจวิธสีลญฺเจว มุทุวจนหิตกามปาปนีวารณกลฺยาณมิตฺตตา จ โส หิ อิธ มทฺทโวติ อธิปฺเปโต ฯ เอเตว ยเส หาเปตฺวาติ เอเต เอตฺตเก ยสทายกธมฺเม หาเปตฺวา ฯ นิพฺพตฺโต เสหิ กมฺเมหีติ อตฺตโน กมฺเมหิ นิพฺพตฺโต ฯ อิทํ วุตฺตํ โหติ อหํ มหาราช อิมสฺมึ โลเก อิสฺสริยทายกํ กตฺตพฺพยุตฺตกํ กมฺมํ อกตฺวา สิปฺปํ อสิกฺขิตฺวา อุปาเยน โภเค อนุปฺปาเทตฺวา อาวาหวิวาหํ อกตฺวา สีลํ อรกฺขิตฺวา มํ อกิจฺจํ กโรนฺตํ นีวารณสมตฺเถ กลฺยาณมิตฺเต อภชิตฺวา อิเม เอตฺตเก ยสทายกตฺตา ยเสติ สงฺขฺยํ คเต โลกปฺปวตฺติธมฺเม อวหาเปตฺวา ฉฑฺเฑตฺวา อิมํ อรญฺญํ ปวิสิตฺวา สยํ กเตหิ ปาปกมฺเมหิ อิทานิ มนุสฺสเปโต หุตฺวา นิพฺพตฺโตสฺมีติ ฯ สหสฺสชีโนวาติ สหสฺสชินปุริโส วิยาติ อตฺโถ ฯ สจาหํ สมฺมา- ปฏิปชฺชิตฺวา โภเค อุปฺปาเทยฺยํ เตหิ อเนกสหสฺเสหิ โภเคหิ ชีโนติปิ อตฺโถ ฯ อปรายโนติ อสรโณ นิปฺปตีติ อตฺโถ ฯ อริยธมฺมาติ สปฺปุริสธมฺมโต ฯ ยถา เปโตติ ยถา มโต เปโต หุตฺวา อุปฺปชฺเชยฺย ชีวมาโนเยว ตถา มนุสฺสเปโต ชาโตสฺมีติ อตฺโถ ฯ สุขกาเม ทุกฺขาเปตฺวาติ สุขกาเม สตฺเต ทุกฺขาเปตฺวา ฯ สุขกาโมติปิ ปาโฐ ฯ สยํ สุขกาโม ปรํ ทุกฺขาเปตฺวาติ อตฺโถ ฯ อาปนฺโนสฺมิ ปทํ อิมนฺติ อิมํ เอวรูปํ โกฏฺฐาสํ ปตฺโตสฺมิ ปถนฺติปิ ปาโฐ ฯ อิทํ ทุกฺขสฺส ปถภูตํ อตฺตภาวํ ปตฺโตสฺมีติ อตฺโถ ฯ ฐิโต ภาณุมกาสิวาติ ภาณุมา วุจฺจติ อคฺคิ วีตจฺฉิตงฺคาเรหิ สมนฺตา ปริกิณฺโณ วิย สรีเร อุฏฺฐิเตน มหาฑาเหน ฑหนฺโต กายิกเจตสิกสุขํ น วินฺทามีติ วทติ ฯ

เอวญฺจ ปน วตฺวา อหํ มหาราช สุขกาโม ปรํ ทุกฺขาเปตฺวา ทิฏฺเฐว ธมฺเม มนุสฺสเปโตสฺมิ ตสฺมา ตฺวํ ปาปกมฺมํ มา กริ อตฺตโน นครํ คนฺตฺวา ทานาทีนิ ปุญฺญานิ กโรหีติ อาห ฯ ราชา ตถา กตฺวา สคฺคปทํ ปูเรสิ ฯ

สรภงฺคสตฺถา อิมํ การณํ อาหริตฺวา ตาปสํ สญฺญาเปสิ ฯ โส ตสฺส กถาย สํเวคํ ปฏิลภิตฺวา ตํ วนฺทิตฺวา ขมาเปตฺวา กสิณปริกมฺมํ กตฺวา นฏฺฐชฺฌานํ ปฏิปากติกํ อกาสิ ฯ สรภงฺโค ตสฺส ตตฺถ วสิตุํ อทตฺวา อาทาย อตฺตโน อสฺสมํ คโต ฯ