เอวํ สตฺต ปจฺเจกพุทฺธา อนุโมทนาย รญฺโญ อมตมหานิพฺพานํ วณฺเณตฺวา ราชานํ อปฺปมาเทน โอวทิตฺวา วุตฺตนเยเนว อตฺตโน วสนฏฺฐานเมว คตา ฯ ราชาปิ สทฺธึ อคฺคมเหสิยา ยาวชีวํ ทานํ ทตฺวา ตโต จวิตฺวา สคฺคปทํ ปูเรสิ ฯ

สตฺถา อิมํ ธมฺมเทสนํ อาหริตฺวา เอวํ ปุพฺเพปิ ปณฺฑิตา วิเจยฺยทานํ อทํสูติ วตฺวา ชาตกํ สโมธาเนสิ ตทา ปจฺเจกพุทฺธา ปรินิพฺพายึสุ สมุทฺทวิชยา ราหุลมาตา อโหสิ เภรุวราชา อหเมวาติ ฯ

อาทิตฺตชาตกํ อฏฺฐมํ ฯ