เอวมฺปิ อิธ วุฑฺฒานํ โย วากฺยํ นาวพุชฺฌติ

อติสีมจโร ทิตฺโต คิชฺโฌ วาตีตสาสโน

สพฺเพ พฺยสนํ ปปฺโปนฺติ อกตฺวา วุฑฺฒสาสนนฺติ ฯ

ตตฺถ ปริสงฺกุปโถติ สงฺกุปโถ ฯ มนุสฺสา หิรญฺญสุวณฺณตฺถาย คจฺฉนฺตา ตสฺมึ ปเทเส ขาณุเก โกเฏตฺวา เตสุ รชฺชุโย พนฺธิตฺวา คจฺฉนฺติ เตน โส คิชฺฌปพฺพเต ชงฺฆมคฺโค สงฺกุปโถติ วุจฺจติ ฯ คิชฺฌปโถติ คิชฺฌปพฺพตมตฺถเก มหามคฺโค ฯ สนนฺตโนติ โปราโณ ฯ ตตฺราสีติ ตสฺมึ คิชฺฌปพฺพตมตฺถเก สงฺกุปเถ เอโก คิชฺโฌ อโหสิ โส ชิณฺณเก มาตาปิตโร โปเสสิ ฯ อชครํ เมทนฺติ อชครเมทํ ฯ อจฺจาหาสีติ อติวิย อาหริ ฯ พหุตฺตโตติ พหุตฺตโส ฯ ชานํ อุจฺจํ ปปาตินนฺติ ปุตฺโต เต อติอุจฺจํ ฐานํ ลงฺฆตีติ สุตฺวา อุจฺจํ ปปาติ อยนฺติ ชานนฺโต ฯ เตชสินฺติ ปุริสเตชสมฺปนฺนํ ฯ ทูรคามินนฺติ เตเนว เตเชน ทูรคามึ ฯ ปริปฺลวตฺตนฺติ อุปฺปลินิปตฺตํ วิย อุทเก อุปฺปลวมานํ ฯ วิชานหีติ วิชานาสิ ฯ จกฺกํว ปริมณฺฑลนฺติ ตสฺมึ เต ปเทเส ฐิตสฺส สมุทฺเทน ปริจฺฉินฺโน ชมฺพุทีโป จกฺกํว ปญฺญายติ ตโต ฐานา นิวตฺตาหีติ โอวทนฺโต เอวมาห ฯ อุทฺธํ ปตฺโตสีติ ปิตุ โอวาทํ อกตฺวา เอกทิวสํ คิชฺเฌหิ สทฺธึ อุปฺปติโต เต โอหาย ปิตรา กถิตฐานํ อคมาสิ ฯ โอโลกยนฺโตติ ตํ ฐานํ ปตฺวา เหฏฺฐา โอโลเกนฺโต ฯ วงฺกงฺโคติ วงฺกคีโว ฯ ยถสฺสาสิ ปิตุสฺสุตนฺติ ยถาสฺส ปิตุ สนฺติกา สุตํ อาสิ ตเถว อทฺทส ฯ ยถาสฺสาสีติปิ ปาโฐ ฯ ปรเมว ปวตฺตถาติ ปิตรา อกฺขาตฐานโต ปรํ อติวตฺตนฺโตว ฯ ตญฺจ วาตสิขา ติกฺขาติ นํ อโนวาทกํ พลิมฺปิ สมานํ ทิชํ ติขิณเวรพฺภวาตสิขา อจฺจาหาสิ อติหริ จุณฺณวิจุณฺณํ อกาสิ ฯ นาสกฺขาติคโตติ นาสกฺขิ อติคโต ฯ โปโสติ สตฺโต ฯ อโนวาทกเรติ ตสฺมึ ทิเช ปณฺฑิตานํ โอวาทํ อกโรนฺเต สพฺเพปิ เต มหาทุกฺขํ ปาปุณึสุ ฯ อกตฺวา วุฑฺฒสาสนนฺติ วุฑฺฒานํ หิตกามานํ วจนํ อกตฺวา เอวเมว พฺยสนํ มหาทุกฺขํ ปาปุณาติ ฯ