ตํ สุตฺวา ตโต มหาสตฺโต สตึ ปฏิลภิตฺวา กาเมสุ อาทีนวํ สลฺลกฺเขตฺวา อฏฺฐมํ คาถมาห

เต อนฺธกรเณ กาเม พหุทุกฺเข มหาวิเส

เตสํ มูลํ คเวสิสฺสํ เฉชฺชํ ราคํ สพนฺธนนฺติ ฯ

ตตฺถ อนฺธกรเณติ ปญฺญาจกฺขุวินาสนโต อนฺธภาวกเร ฯ พหุทุกฺเขติ เอตฺถ อปฺปสฺสาทา กามาติ อาทีนิ สุตฺตานิ อาหริตฺวา เตสํ พหุทุกฺขตา ทสฺเสตพฺพา ฯ มหาวิเสติ สมฺปยุตฺตกิเลสวิสสฺส เจว วิปากวิสสฺส จ มหนฺตตาย มหาวิเส ฯ เตสํ มูลนฺติ เต วุตฺตปฺปกาเร กาเม ปหาตุํ เตสํ มูลํ คเวสิสฺสํ ปริเยสิสฺสามิ ฯ กึ ปน เตสํ มูลนฺติ ฯ อโยนิโสมนสิกาโร ฯ เฉชฺชํ ราคํ สพนฺธนนฺติ มหาราช อิทานิ ปญฺญาขคฺเคน ปหริตฺวา สุภนิมิตฺต- พนฺธเนน สพนฺธนํ ราคํ ฉินฺทิสฺสามีติ ฯ