สมฺมาสมฺพุทฺโธ อิมํ ธมฺมเทสนํ กเถตฺวา อภิสมฺพุทฺโธว หุตฺวา อิมํ คาถํ กเถสิ

อปฺปเกนปิ เมธาวี ปาภเฏน วิจกฺขโณ

สมุฏฺฐาเปติ อตฺตานํ อณุํ อคฺคึว สนฺธมนฺติ ฯ

ตตฺถ อปฺปเกนปีติ โถเกนาปิ ปริตฺเตนาปิ ฯ เมธาวีติ ปญฺญวา ฯ ปาภเฏนาติ ภณฺฑมูเลน ฯ วิจกฺขโณติ โวหารกุสโล ฯ สมุฏฺฐาเปติ อตฺตานนฺติ มหนฺตํ ธนยสํ อุปฺปาเทตฺวา ตตฺถ อตฺตานํ สณฺฐเปติ ปติฏฺฐาเปติ ฯ ยถา กึ ฯ อณุํ อคฺคึว สนฺธมนฺติ ยถา ปณฺฑิโต ปุริโส ปริตฺตกํ อคฺคึ อนุกฺกเมน โคมยจุณฺณาทีนิ ปกฺขิปิตฺวา มุขวาเตน ธมนฺโต สมุฏฺฐาเปติ วฑฺเฒติ มหนฺตํ อคฺคิกฺขนฺธํ กโรติ เอวเมว ปณฺฑิโต โถกํปิ ปาภฏํ ลภิตฺวา นานาอุปาเยหิ ปโยเชตฺวา ธนญฺจ ยสญฺจ อุปฺปาเทสิ วฑฺเฒติ วฑฺเฒตฺวา จ ปน ตตฺถ อตฺตานํ ปติฏฺฐาเปติ ตายเอว วา ปน ธนยสมหนฺตตาย อตฺตานํ สมุฏฺฐาเปติ อภิญฺญาตํ ปากฏํ กโรตีติ อตฺโถ ฯ