กลฺยาณภาวมฺเห ทิเชสุ สมฺมตา

อภีตรูปา วิจราม อณฺณเว

น ฆาสเหตุปิ กโรม ปาปนฺติ ฯ

ตตฺถ มนุสฺสหึสาติ กาโก มนุสฺเส หึสติ วิเหเฐติ เตน ตํ เอวํ อาลปติ ฯ อนุพฺพเตติ อญฺญมญฺญํ อนุคเต สมฺโมทมาเน ปิยสํวาเส ฯ จกฺกวาเกติ จกฺกวากา นาม สา อณฺฑชชาตีติ ปสํสนฺติ วณฺเณนฺติ กเถนฺติ ฯ ทิเชสูติ ยตฺตกา ปกฺขิโน นาม เตสุ มยํ กลฺยาณภาวาติปิ มนุสฺเสสุ สมฺมตา ฯ ทุติเย อตฺถวิกปฺเป มนุสฺเสสุ อมฺเห จกฺกวากาติ วทนฺติ ทิเชสุ ปน มยํ กลฺยาณภาวาติ โน ทิชา วทนฺติ ฯ อณฺณเวติ อิมสฺมึ ฐาเน สโร อณฺณโวติ วุตฺโต อิมสฺมึ ปทุมสเร มยเมว เทฺว ชนา ปเรสํ อหึสนโต อภีตรูปา วิจรามาติ อตฺโถ ฯ อิมิสฺสา จ ปน คาถาย จตุตฺถปทํ น ฆาสเหตุํปิ กโรม ปาปนฺติ ปฐนฺติ ฯ ตสฺสตฺโถ ยสฺมา มยํ ฆาสเหตุ ปาปํ น กโรม ตสฺมา กลฺยาณภาวาติ อมฺเห มนุสฺเสสุ จ ทิเชสุ จ สมฺมตาติ ฯ