ตตฺถ อสุทฺธภกฺโขสีติ ตฺวํ เถเนตฺวา วญฺเจตฺวา ภกฺขนโต อสุทฺธภกฺโข ฯ ขณานุปาตีติ ปมาทกฺขเณ อนุปตนสีโล ฯ กิจฺเฉน เตติ ตสฺส ตว ทุกฺเขน อนฺนปานํ ลพฺภติ ฯ มํสานิ วาติ ยานิ วา สุสานมชฺเฌ มํสานิ เตหิ น ตุสฺสสิ ฯ ตโตติ ปจฺฉา ฯ อุปกฺโกสติ นํ สภาโวติ อตฺตาว ตํ ปุคฺคลํ ครหติ ฯ อุปกฺกุฏฺโฐติ อตฺตนาปิ อปเรหิปิ อกฺกุฏฺโฐ ครหิโต วิปฺปฏิสาริตาย วณฺณญฺจ พลญฺจ ชหาติ ฯ นิพฺพุตึ ภุญฺชติ ยทีติ ยทิ ปน ปรํ อวิเหเฐตฺวา อปฺปกมฺปิ ธมฺมลทฺธํ นิพฺพุตึ โภชนํ ภุญฺชติ ฯ ตทสฺส โหตีติ ตทา อสฺส ปณฺฑิตสฺส สรีเร พลญฺจ วณฺณญฺจ โหติ ฯ อาหารมเยนาติ นานปฺปกาเรน อาหาเรเนว ฯ อิทํ วุตฺตํ โหติ โภ กาก วณฺโณ นาเมส จตุสมุฏฺฐาโน โส น อาหารมตฺเตเนว โหติ อุตุจิตฺตกมฺเมหิปิ โหติเยวาติ ฯ

เอวํ จกฺกวาโก อเนกปริยาเยน กากํ ครหิ ฯ กาโก หรายิตฺวา น มยฺหํ ตว วณฺเณน อตฺโถติ กา กาติ วสฺสนฺโต ปลายิ ฯ

สตฺถา อิมํ ธมฺมเทสนํ อาหริตฺวา สจฺจานิ ปกาเสตฺวา ชาตกํ สโมธาเนสิ ฯ สจฺจปริโยสาเน โลลภิกฺขุ อนาคามิผเล ปติฏฺฐหิ ฯ ตทา กาโก โลลภิกฺขุ อโหสิ จกฺกวากี ราหุลมาตา จกฺกวาโก ปน อหเมวาติ ฯ

จกฺกวากชาตกํ อฏฺฐมํ ฯ