น มาตุคาเมหิ กเรยฺย สนฺถวนฺติ ฯ

ตตฺถ สุทิฏฺฐรูปุคฺคตปานุวตฺตินาติ ภนฺเต อิสิ อุคฺคตปานุวตฺตินา ตยา สุทิฏฺฐรูปํ อิทํ การณํ ฯ หีนาติ นีจา ฯ ยถา หเว ปาณริเวตฺถ รกฺขิตาติ เอตฺถ อยํ มยา อตฺตโน ปาณา วิย เอตฺถ อนฺโตกุจฺฉิยํ ปริหรนฺเตน รกฺขิตา ฯ ทุฏฺฐา มยีติ อิทานิ มยิ มิตฺตทุพฺภิกมฺมํ กตฺวา ทุฏฺฐา อญฺญํ ปุริสํ อภิปฺปโมทติ ฯ โชติริวา วเน วสนฺติ วเน วสนฺเตน ตปสฺสินา อคฺคิ วิย มยา อุปฏฺฐิตา ปริจริตา ฯ สา ธมฺมมุกฺกมฺมาติ สา เอสา ธมฺมํ อุกฺกมิตฺวา อติกฺกมิตฺวา ฯ อกฺรียรูโปติ อกตฺตพฺพรูโป ฯ สรีรมชฺฌมฺหิ ฐิตาติ มญฺญิหํ มยฺหํ อยนฺติ อสตํ อสญฺญตนฺติ อิมํ อสตํ อสปฺปุริสธมฺมสมนฺนาคตํ อสญฺญตํ ทุสฺสีลํ มยฺหํ สรีรมชฺฌมฺหิ ฐิตาติ จ มยฺหํ อยนฺติ จ มญฺญามิ ฯ สุรกฺขิตมฺเมติ กถนฺนุ วิสฺสเสติ อยํ มยา สุรกฺขิตาติ กถํ ปณฺฑิโต วิสฺสาเสยฺย ยตฺร หิ นาม มาทิโสปิ อตฺตโน กุจฺฉิยํ รกฺขนฺโต รกฺขิตุํ นาสกฺขิ ฯ ปาตาลปปาตสนฺนิภาติ โลกสฺสาเทน ทุปฺปูรณียตฺตา มหาสมุทฺเท ปาตาลสงฺขาเตน ปปาเตน สทิสา ฯ เอตฺถปฺปมตฺโตติ เอวรูเปสุ เอตาสุ นิคฺคุณาสุ ปมตฺโต ปุริโส มหาพฺยสนํ ปาปุณาติ ฯ ตสฺมา หีติ ยสฺมา มาตุคามวสงฺคตา มหาวินาสํ ปาปุณนฺติ ตสฺมา เย มาตุคามาหิ นิสฺสฏา หุตฺวา จรนฺติ เต สุขิโน ฯ เอตํ สิวนฺติ ยเทตํ มาตุคามโต นิสฺสฏานํ วิสํสฏฺฐานํ จรณํ เอตํ ฌานสุขเมว สิวํ เขมํ อุตฺตมํ อภิปตฺเถตพฺพํ เอตํ ปตฺถยมาโน มาตุคาเมหิ สทฺธึ สนฺถวํ น กเรยฺยาติ ฯ

เอวญฺจ ปน วตฺวา ทานโว มหาสตฺตสฺส ปาเทสุ ปติตฺวา ภนฺเต ตุมฺเห นิสฺสาย มยา ชีวิตํ ลทฺธํ นมฺหิ อิมายาหํ ปาปธมฺมาย วิชฺชาธเรน มาราปิโตติ มหาสตฺตํ อภิตฺถวิ ฯ โสปิสฺส ธมฺมํ เทเสตฺวา อิมิสฺสา มา กิญฺจิ ปาปกํ อกาสิ สีลานิ คณฺหาติ ตํ ปญฺจสุ สีเลสุ ปติฏฺฐาเปสิ ฯ ทานโว อหํ กุจฺฉนา ปริหรนฺโตปิ ตํ รกฺขิตุํ น สกฺโกมิ อญฺโญ โกจิ รกฺขิสฺสตีติ ตํ อุยฺโยเชตฺวา อตฺตโน อรญฺญเมว ปาวิสิ ฯ

สตฺถา อิมํ ธมฺมเทสนํ อาหริตฺวา สจฺจานิ ปกาเสตฺวา ชาตกํ สโมธาเนสิ ฯ สจฺจปริโยสาเน อุกฺกณฺฐิตภิกฺขุ โสตาปตฺติผเล ปติฏฺฐหิ ฯ ตทา ทิพฺพจกฺขุตาปโส อหเมวาติ ฯ