อยํ อภิสมฺพุทฺธคาถา อโหสิ

น อกาเล วิเปกฺเขยฺย กาเล เปกฺเขยฺย ปณฺฑิโต

ปูติมํโสว ปชฺฌาติ โย อกาเล วิเปกฺขตีติ ฯ

ตตฺถ อกาเลติ กามคุเณ อารพฺภ สุภวเสน จิตฺตุปฺปาทกาเล ฯ อยํ หิ ภิกฺขุโน รูปํ โอโลเกตุํ อกาโล นาม ฯ กาเลติ อสุภวเสน อนุสฺสติวเสน วา กสิณวเสน วา รูปคฺคหณกาเล ฯ อยํ หิ ภิกฺขุโน รูปํ โอโลเกตุํ กาโล นาม ฯ ตตฺถ อกาเลติ สารตฺตกาเล รูปํ โอโลเกนฺตา มหาวินาสํ ปาปุณนฺตีติ หริตจชาตกโลมสกสฺสปชาตกาทีหิ ทีเปตพฺพํ ฯ กาเลติ อสุภวเสน โอโลเกนฺโต อรหตฺเต ปติฏฺฐหตีติ อสุภกมฺมิกติสฺสตฺเถรวตฺถุนา กเถตพฺพํ ฯ ปูติมํโสว ปชฺฌาตีติ ภิกฺขเว ยถา ปูติมํสสิคาโล อกาเล เอฬิกํ โอโลเกนฺโต อตฺตโน โคจรา ปริหีโน ปชฺฌายติ เอวํ ภิกฺขุ อกาเล สุภวเสน รูปํ โอโลเกตฺวา สติปฏฺฐานาทิโคจรา ปริหีโน ทิฏฺฐธมฺเมปิ สมฺปราเยปิ ปชฺฌายติ กิลมติ ฯ