อติสโร อจฺจสโร มิตฺตวินฺทุ สุโณหิ เม

จกฺกนฺเต สิรสฺมิมาวิทฺธํ น ตฺวํ ชีวํ ปโมกฺขสีติ ฯ

ตตฺถ อติสโรติ อติสรีติปิ อติสโร อติสริสฺสตีติปิ อติสโร ฯ อจฺจสโรติ ตสฺเสว เววจนํ ฯ อิทํ วุตฺตํ โหติ อมฺโภ มิตฺตวินฺทุก สุโณหิ เม วจนํ ตฺวํ หิ อติทารุณสฺส กมฺมสฺส กตตฺตา อติสโร ตสฺส ปน น สกฺกา วสฺสคฺคณนาย วิปากํ สญฺญาเปตุนฺติ อปริมาณํ อติมหนฺตํ วิปากทุกฺขํ สริสฺสสิ ปฏิปชฺชิสฺสสีติ จ อติสโร ฯ เตน เต เอตฺตกานิ วสฺสสหสฺสานิ วสฺสสตสหสฺสานีติ วตฺตุํ น สกฺโกมิ ฯ สิรสฺมิมาวิทฺธนฺติ ยํ ปน เต อิทํ จกฺกํ สิรสฺมึ อาวิทฺธํ กุมฺภการจกฺกมิว ภมติ ฯ น ตฺวํ ชีวํ ปโมกฺขสีติ ตํ ตฺวํ ยาว เต กมฺมวิปากํ น ขียติ ตาว ชีวมาโน น โมกฺขสิ กมฺมวิปาเก ปน ขีเณ อิทํ จกฺกํ ปหาย ยถากมฺมํ คมิสฺสสีติ ฯ

อิทํ วตฺวา เทวปุตฺโต อตฺตโนเทววิมานเมว คโต ฯ อิตโรปิ มหาทุกฺขํ ปฏิปชฺชิ ฯ