อตีเต พาราณสิยํ พฺรหฺมทตฺเต รชฺชํ กาเรนฺเต อญฺญตรสฺมึ กาสิกคาเม เอกสฺส กุลสฺส เอกปุตฺตโก อโหสิ นาเมน สวิฏฺฐโก นาม ฯ โส มาตาปิตโร ปฏิชคฺคนฺโต อปรภาเค มาตริ กาลกตาย ปิตรํ โปเสสีติ สพฺพํ วตฺถุํ ปจฺจุปฺปนฺนวตฺถุนิยาเมเนว กเถตพฺพํ ฯ อยํ ปเนตฺถ วิเสโส ตทา สา อิตฺถี ปสฺสสิ ปิตุ กมฺมํ อิทญฺจิทญฺจ มา กรีติ วุตฺเต กุชฺฌตีติ วตฺวา สามิ ปิตา เต จณฺโฑ ผรุโส นิจฺจํ กลหํ กโรติ ชราชิณฺโณ พฺยาธิปีฬิโต น จิรสฺเสว มริสฺสติ อหํ เอเตน สทฺธึ เอกเคเห วสิตุํ น สกฺโกมิ อยํเปส กติปาเหน มริสฺสเตว ตฺวํ เอตํ อามกสุสานํ เนตฺวา อาวาฏํ ขนิตฺวา ตตฺถ นํ ปกฺขิปิตฺวา กุทฺทาเลน สีสํ ภินฺทิตฺวา ชีวิตกฺขยํ ปาเปตฺวา อุปริ ปํสุนา ฉาเทตฺวา อาคจฺฉาติ อาห ฯ โส ตาย ปุนปฺปุนํ วุจฺจมาโน ภทฺเท ปุริสมรณํ นาม ภาริยํ กถํ นํ มาเรสฺสามีติ ฯ อหํ เต อุปายํ อาจิกฺขิสฺสามีติ ฯ อาจิกฺข ตาวาติ ฯ สามิ ตฺวํ ปจฺจูสกาเลปิ ปิตุ นิปนฺนฏฺฐานํ คนฺตฺวา ยถา สพฺเพ สุณนฺติ เอวํ มหาสทฺทํ กตฺวา ตาต อสุกคาเม ตุมฺหากํ อุทฺธารณโก อตฺถิ มยิ คเต น เทติ ตุมฺหากํ อจฺจเยน นสฺสเตว เสฺว ยานเก นิสีทิตฺวา ปาโตว คจฺฉิสฺสามาติ วตฺวา เตน วุตฺตเวลายเมว อุฏฺฐาย ยานกํ โยเชตฺวา ตตฺถ นํ นิสีทาเปตฺวา อามกสุสานํ อาเนตฺวา อาวาฏํ นิกฺขนิตฺวา โจเรหิ อจฺฉินฺนสทฺทํ กตฺวา มาเรตฺวา อาวาเฏ ปกฺขิปิตฺวา สีสํ ภินฺทิตฺวา นหายิตฺวา อาคจฺฉาติ ฯ สวิฏฺฐโก อตฺเถโส อุปาโยติ ตสฺสา วจนํ สมฺปฏิจฺฉิตฺวา ยานกํ คมนสชฺชํ อกาสิ ฯ ตสฺส ปเนโก สตฺตวสฺสิโก ปุตฺโต อตฺถิ ปณฺฑิโต พฺยตฺโต ฯ โส มาตุ วจนํ สุตฺวา มยฺหํ มาตา ปาปธมฺมา ปิตรํ เม ปิตุฆาตกมฺมํ กาเรสิ อหมสฺส ปิตุฆาตกมฺมํ กาตุํ น ทสฺสามีติ สณิกํ คนฺตฺวา อยฺยเกน สทฺธึ นิปชฺชิ ฯ สวิฏฺฐโก จ ปิตรา วุตฺตเวลาย ยานกํ โยเชตฺวา เอหิ ตาต อุทฺธารํ โสเธสฺสามาติ ปิตรํ ยานเก นิสีทาเปสิ ฯ กุมารโกปิ ปฐมตรํ ยานกํ อภิรูหิ ฯ สวิฏฺฐโก ตํ นิวาเรตุํ อสกฺโกนฺโต เตเนว สทฺธึ อามกสุสานํ คนฺตฺวา ปิตรญฺจ กุมารญฺจ ยานเกน สทฺธึ เอกมนฺเต ฐเปตฺวา สยํ โอตริตฺวา กุทฺทาลปิฏกํ อาทาย เอกสฺมึ ปฏิจฺฉนฺนฏฺฐาเน จตุรสฺสอาวาฏํ ขนิตุํ อารภิ ฯ กุมารโกปิ โอตริตฺวา ตสฺส สนฺติกํ คนฺตฺวา อชานนฺโต วิย กถํ สมุฏฺฐาเปตฺวา ปฐมํ คาถมาห