ตตฺถ รกฺขตีติ ธมฺโม นาเมส รกฺขิโต อตฺตโน รกฺขิตํ ปฏิรกฺขติ ฯ สุขมาวหาตีติ เทวมนุสฺเสสุ สุขญฺเจว นิพฺพานสุขญฺจ อาวหาติ ฯ น ทุคฺคตินฺติ นิรยาทิเภทํ ทุคฺคตึ น คจฺฉติ ฯ เอวํ พฺราหฺมณ มยํ ธมฺมํ รกฺขาม ธมฺโมปิ อมฺเห รกฺขตีติ ทสฺเสติ ฯ ธมฺเมน คุตฺโตติ มหาฉตฺตสทิเสน อตฺตนา โคปิตธมฺเมน คุตฺโต ฯ อญฺญสฺส อฏฺฐีนีติ ตยา อานีตานิ ปน อฏฺฐีนิ อญฺญสฺส เอฬกสฺส วา สุนขสฺส วา อฏฺฐีนิ ภวิสฺสนฺติ ฉฑฺเฑหิ ตานิ มม ปุตฺโต สุขี กุมาโรติ ฯ

ตํ สุตฺวา อาจริโย อาห มยฺหํ อาคมนํ สุอาคมนํ สผลํ โน นิปฺผลนฺติ สญฺชาตโสมนสฺโส ธมฺมปาลสฺส ปิตรํ ขมาเปตฺวา มยา อาคจฺฉนฺเตน ตุมฺหากํ วีมํสนตฺถาย อิมานิ เอฬกฏฺฐีนิ อาภตานิ ปุตฺโต เต อโรโคเยว ตุมฺหากํ รกฺขิตธมฺเม มยฺหํปิ เทถาติ ปณฺเณ ลิขิตฺวา กติปาหํ ตตฺถ วสิตฺวา ตกฺกสิลํ คนฺตฺวา ธมฺมปาลสฺส สพฺพสิปฺปานิ สิกฺขาเปตฺวา มหนฺเตน ปริวาเรน เปเสสิ ฯ

สตฺถา สุทฺโธทนมหาราชสฺส อิมํ ธมฺมเทสนํ อาหริตฺวา สจฺจานิ ปกาเสตฺวา ชาตกํ สโมธาเนสิ ฯ สจฺจปริโยสาเน ราชา อนาคามิผเล ปติฏฺฐหิ ฯ ตทา มาตาปิตโร มหาราชกุลานิ อเหสุํ อาจริโย สารีปุตฺโต ปริสา พุทฺธปริสา อเหสุํ ธมฺมปาลกุมาโร ปน อหเมวาติ ฯ

มหาธมฺมปาลชาตกํ นวมํ ฯ