อิมินา ปริยาเยน ปลิตานิ วิสุทฺธิเทวานํ ทูตตฺตา เทวทูตาติ วุจฺจนฺติ ฯ ปพฺพชฺชาสมโย มมนฺติ คิหิภาวโต นิกฺขมนฏฺเฐน ปพฺพชฺชาติ ลทฺธนามสฺส สมณลิงฺคคหณสฺส กาโล มยฺหนฺติ ทสฺเสติ ฯ

โส เอวํ วตฺวา ตํ ทิวสเมว รชฺชํ ปหาย อิสิปพฺพชฺชํ ปพฺพชิตฺวา ตสฺมึเยว มฆอมฺพวเน วิหรนฺโต จตุราสีติวสฺสสหสฺสานิ จตฺตาโร พฺรหฺมวิหาเร ภาเวตฺวา อปริหีนชฺฌาเน ฐิโต กาลํ กตฺวา พฺรหฺมโลเก นิพฺพตฺติตฺวา ปุน ตโต จุโต มิถิลายเมว เนมิ นาม ราชา หุตฺวา โอสฺสกฺกมานํ อตฺตโน วํสํ ฆเฏตฺวา ตตฺเถว อมฺพวเน ปพฺพชิตฺวา พฺรหฺมวิหาเร ภาเวตฺวา ปุน พฺรหฺมโลกูปโคว อโหสิ ฯ

สตฺถาปิ น ภิกฺขเว ตถาคโต อิทาเนว มหาภินิกฺขมนํ นิกฺขมนฺโต ปุพฺเพปิ นิกฺขนฺโตเยวาติ วตฺวา อิทํ ธมฺมเทสนํ อาหริตฺวา ทสฺเสตฺวา จตฺตาริ อริยสจฺจานิ ปกาเสสิ ฯ สจฺจปริโยสาเน เกจิ โสตาปนฺนา อเหสุํ เกจิ สกทาคามิโน เกจิ อนาคามิโน ฯ อิติ ภควา อิมานิ เทฺว วตฺถูนิ กเถตฺวา อนุสนฺธึ ฆเฏตฺวา ชาตกํ สโมธาเนสิ ตทา กปฺปโก อานนฺโท อโหสิ ปุตฺโต ราหุโล มฆเทวราชา ปน อหเมวาติ ฯ

มฆเทวชาตกํ นวมํ ฯ