ตาสํ อตฺโถ โภ มหาเสฏฺฐิ อปจนฺตาปิ สนฺโต สปฺปุริสา ภิกฺขาจริยาย ลทฺธํปิ โภชนํ ทาตุํ อิจฺฉนฺติ น เอกิกา ปริภุญฺชนฺติ ฯ กิเมว ตฺวนฺติ ตฺวํ หิ ปจมาโน ยํ น ทเทยฺยาสิ ฯ น ตํ สมนฺติ ตํ ตว อนุรูปํ อนุจฺฉวิกํ น โหติ ฯ ทานญฺหิ มจฺเฉเรน จ ปมาเทน จาติ ทฺวีหิ โทเสหิ น ทิยฺยติ ปุญฺญํ ปน อากงฺขมาเนน วิชานตา ปณฺฑิตมนุสฺเสน ตว สทิเสน ทาตพฺพเมว โหตีติ ฯ

โส ตสฺส วจนํ สุตฺวา เตนหิ เคหํ ปวิสิตฺวา นิสีท โถกํ ลจฺฉสีติ อาห ฯ สกฺโก ปวิสิตฺวา เต สิโลเก สชฺฌายนฺโต นิสีทิ ฯ อถ นํ จนฺโท อาคนฺตฺวา ภตฺตํ ยาจิ ฯ นตฺถิ เต ภตฺตํ คจฺฉาติ จ วุตฺเต มหาเสฏฺฐิ อนฺโต เอโก พฺราหฺมโณ นิสินฺโน พฺราหฺมณ- วาจกํ มญฺเญ ภวิสฺสติ อหํปิ ปวิสิสฺสามีติ วตฺวา นตฺถิ พฺราหฺมณวาจกํ นิกฺขมาติ วุจฺจมาโนปิ มหาเสฏฺฐิ อิงฺฆ ตาว สิโลกํ สุโณหีติ เทฺว คาถา อภาสิ

ยสฺเสว ภีโต น ททาติ มจฺฉรี ตเทว อททโต ภยํ

ชิฆจฺฉา จ ปิปาสา จ ยสฺส ภายติ มจฺฉรี