ตตฺถ วิรุฬฺหาติ วฑฺฒิตานาม นตฺเถตฺถ สํสโยติ อาสึสวเสเนวมาห ฯ สลฺลกิโย จ กุฏชาติ อินฺทสาลรุกฺขา จ กุฏชรุกฺขา จ ฯ กุรุวินฺทกรวรา ภิสสามาติ กุรุวินฺทรุกฺขา จ กรวรนามกานิ มหาติณานิ จ ภิสานิ จ สามกานิ จาติ อตฺโถ ฯ เอเต จ สพฺเพ อิทานิ วฑฺฒิสฺสนฺตีติ ปริเทวนฺตี ฯ นิวาเตติ ปพฺพตปาเท ฯ ปุปฺผิตาติ มม ปุตฺเตน สาขา ภญฺชิตฺวา อขาทิยมานา กณฺณิการา จ ปุปฺผิตา ภวิสฺสนฺตีติ วุตฺตํ โหติ ฯ โกจิเทวาติ กตฺถจิเทว คาเม วา นคเร วา ฯ สุวณฺณกายุราติ สุวณฺณาภรณา ราชราชมหามตฺตา ฯ ภรนฺติ ปิณฺเฑนาติ อชฺช มาตุโปสกํ นาคราชํ ราชารหสฺส โภชนสฺส สุวฑฺฒิเตน ปิณฺเฑน โปเสนฺติ ฯ ยตฺถาติ ยสฺมึ นาคราเช ราชา นิสีทิตฺวา ฯ กวจมภิเหสฺสตีติ สงฺคามํ ปวิสิตฺวา ปจฺจามิตฺตานํ กวจํ อภิหนิสฺสติ ภินฺทิสฺสตีติ ฯ อิทํ วุตฺตํ โหติ ยตฺถ มม ปุตฺเต นิสินฺโน ราชา วา ราชกุมาโร วา อสํภีโต หุตฺวา สมฺปตฺตานํ กวจํ หนิสฺสติ ตํ เม นาคราชานํ สุวณฺณาภรณา อชฺช ปิณฺเฑน ภรนฺตีติ ฯ

หตฺถาจริโยปิ อนฺตรามคฺเค วตฺตมาโน จ รญฺโญ สาสนํ เปเสสิ ฯ ราชา นครํ อลงฺการาเปสิ ฯ หตฺถาจริโยปิ โพธิสตฺตํ กตคนฺธปริภณฺฑํ อลงฺกตปฏิยตฺตํ หตฺถิสาลํ เนตฺวา วิจิตฺตสาณิยา ปริกฺขิปาเปตฺวา อุปริ วิจิตฺตานิ พนฺธาเปตฺวา รญฺโญ อาโรจาเปสิ ฯ ราชา นานคฺครสโภชนํ อาทาย อาคนฺตฺวา โพธิสตฺตสฺส อทาสิ ฯ โส มาตรํ วินา โคจรํ น คณฺหิสฺสามีติ ปิณฺฑํ น คณฺหิ ฯ อถ นํ ยาจนฺโต ราชา ตติยํ คาถมาห

คณฺหาหิ นาค กพลํ มา นาค กิสโก ภว

พหูนิ ราชกิจฺจานิ ตานิ นาค กริสฺสสีติ ฯ