ตตฺถ สุจีติ สุจิวตฺถนิวตฺถา ฯ สญฺญตูรูติ สุฏฺฐุ ฐปิตอูรุ อิริยาปถํ สณฺฐเปตฺวา สุจิวตฺถา เอกิกาว นิสินฺนาสีติ วุตฺตํ โหติ ฯ อนินฺทิตงฺคีติ ปาทนฺตโต ยาว เกสคฺคา อนินฺทิตสรีรา ปรมโสภคฺคปฺปตฺตสรีรา ฯ กินฺนรเนตฺตจกฺขูติ ตีหิ มณฺฑเลหิ ปญฺจหิ จ ปสาเทหิ อุปโสภิตตฺตา กินฺนรานํ เนตฺตสทิเสหิ จกฺขูหิ สมนฺนาคเต ฯ อิเมกรตฺตินฺติ อิทํ เอกรตฺตึ อชฺช อิมสฺมึ อลงฺกตสยนคพฺเภ เอกโต วเสยฺยามาติ ยาจติ ฯ

ตโต ราชธีตา เทฺว คาถา อภาสิ

โอกิณฺณนฺตรปริกฺขํ ทฬฺหมณฺฑาลโกฏฺฐกํ

รกฺขิตํ ขคฺคหตฺเถหิ ทุปฺปเวสมิทํ ปุรํ ฯ