สทฺโธ มุทู สํวิภาคี วทญฺญู

สงฺคาหโก สขิโล สณฺหวาโจ

เอตฺถ ฐิโต ปรโลกํ น ภาเยติ ฯ

ตสฺสตฺโถ ภทฺเท โย วาจํ มนญฺจ สมฺมา ฐเปตฺวา กาเยนปิ ปาปานิ อกโรนฺโต อิเม ทส กุสลกมฺมปเถ สมาทาย ปวตฺตนฺโต พหุอนฺนปาเน ปหุตเทยฺยธมฺเม ฆเร วสนฺโต ทานสฺส วิปาโก อตฺถีติ สทฺธาย สมนฺนาคโต มุทุจิตฺโต ทานสํวิภาคตาย สํวิภาคี ปพฺพชิตา ภิกฺขาย จรมานา วทนฺติ เตสํ ปจฺจยทานชานนโต อิมสฺส วาทสฺส ชานนโต วทญฺญู จตูหิ สงฺคหวตฺถูหิ สงฺคาหโก ปิยภาณิตาย สขิโล อตฺถวจนตาย สณฺหวาโจ เอตฺถ เอตฺตเก คุณราสิมฺหิ ฐิโต ปรโลกํ คจฺฉนฺโต น ภายตีติ ฯ