ทีปญฺจ กตฺตุมิจฺฉามิ ยํ ชรา นาภิกีรตีติ ฯ

ตตฺถ ทีปญฺจาติ ตาต เนว มยฺหํ กาเมหิ โอนํ อตฺถิ น มํ หึสนฺโต โกจิ อตฺถิ อหํ ปน ปรโลกคมนาย อตฺตโน ปติฏฺฐํ กตฺตุํ อิจฺฉามิ ฯ ยํ ชรา นาภิกีรตีติ ยํ ทีปํ ชรา นาภิกีรติ น วิทฺธํเสติ ตมหํ กตฺตุมิจฺฉามิ อมตมหานิพฺพานํ คเวสิสฺสามิ น เม กาเมหิ อตฺโถ อนุชานาถ มํ มหาราชาติ วทติ ฯ

อิติ ปุนปฺปุนํ กุมาโร ปพฺพชฺชํ ยาจิ ฯ ราชา มา ปพฺพชาติ นิวาเรติ ฯ ตมตฺถํ ปกาเสนฺโต สตฺถา อุปฑฺฒคาถมาห

ปุตฺโต วา ปิตรํ ยาเจ ปิตา วา ปุตฺตโมรสนฺติ ฯ