อิเมสํ อฏฺฐนฺนํ โลกธมฺมานํ เยนเกนจิ จิตฺเตน ปญฺญายนฺติ ตสฺส จ อนิจฺจตํ ญตฺวา ฐิตสฺส ธีรสฺส ปิยปุตฺตมรณาทิวตฺถุกา มหนฺตาปิ โสกา หทยํ น ตาปยนฺตีติ ฯ เอกํ วา อฏฺฐวิธํ โลกธมฺมํ ญตฺวา ธีรสฺส หทยวตฺถุญฺจ มนญฺจ มหนฺตาปิ โสกา น ตาปยนฺตีติ เอวเมตฺถ อตฺโถ ทฏฺฐพฺโพ ฯ โสหํ ยสญฺจ โภคญฺจาติ คาถาย ตาต ภรต อนฺธพาลสตฺตานํ วิย มม โรทนปริเทวนํนาม อนนุจฺฉวิกํ อหํ ปน ปิตุ อจฺจเยน ตสฺส ฐาเนว ฐตฺวา กปณาทีนํ ทานารหานํ ทานํ ฐานนฺตรารหานํ ฐานนฺตรํ ยสารหานํ ยสํ ทสฺสามิ ปิตรา เม ปริภุตฺตนเยน อิสฺสริยํ ภุญฺชิสฺสามิ ญาตเก โปเสสฺสามิ อวเสสญฺจ อนฺโต ปริชนาธิกํ ชนํ ปาเลสฺสามิ ธมฺมิกสมณพฺราหฺมณานํ ธมฺมิการกฺขาวรณคุตฺตึ กริสฺสามีติ เอตญฺหิ วิชานโต ปณฺฑิตปุริสสฺส อนุรูปํ กิจฺจนฺติ อตฺโถ ฯ

ปริสา อิมํ รามปณฺฑิตสฺส อนิจฺจตาปกาสนํ ธมฺมเทสนํ สุตฺวา นิสฺโสกา อเหสุํ ฯ ตโต ภรตกุมาโร รามปณฺฑิตํ วนฺทิตฺวา พาราณสิรชฺชํ ปฏิจฺฉถาติ อาห ฯ ตาต ลกฺขณญฺจ สิตเทวิญฺจ คเหตฺวา รชฺชํ อนุสาสถาติ ฯ ตุมฺเห ปน เทวาติ ฯ ตาต มม ปิตา ทฺวาทสวสฺสจฺจเยน อาคนฺตฺวา รชฺชํ กเรยฺยาสีติ มํ อโวจ อหํ อิทาเนว คจฺฉนฺโต ตสฺส วจนกโรนาม นาโหมิ อญฺญานิ ปน ตีณิ วสฺสานิ อติกฺกมิตฺวา อาคมิสฺสามีติ ฯ เอตฺตกํ กาลํ โก รชฺชํ กาเรสฺสตีติ ฯ ตุมฺเห กาเรถาติ ฯ น มยํ กาเรสฺสามาติ ฯ เตนหิ ยาว มมาคมนา อิมานิ ปาทุกา กาเรสฺสนฺตีติ อตฺตโน ติณปาทุกา โอมุญฺจิตฺวา อทาสิ ฯ ตโยปิ ชนา ปาทุกา คเหตฺวา รามปณฺฑิตํ วนฺทิตฺวา มหาชนปริวุตา พาราณสึ อคมํสุ ฯ ตีณิ สํวจฺฉรานิ ปาทุกา รชฺชํ กาเรสุํ ฯ อมจฺจา ติณปาทุกา ราชปลฺลงฺเก ฐเปตฺวา อฏฺฏํ วินิจฺฉนนฺติ ฯ สเจ ทุวินิจฺฉิโต โหติ ปาทุกา อญฺญมญฺญํ ปฏิหญฺญนฺติ ตาย สญฺญาย ปุน วินิจฺฉนนฺติ สมฺมาวินิจฺฉิตกาเล ปาทุกา นิสฺสทฺทาว สนฺนิสีทนฺติ ฯ รามปณฺฑิโต ติณฺณํ สํวจฺฉรานํ อจฺจเยน อรญฺญา นิกฺขมิตฺวา พาราณสินครํ ปตฺวา อุยฺยานํ ปาวิสิ ฯ ตสฺสาคตภาวํ ญตฺวา กุมารา อมจฺจปริวุตา อุยฺยานํ คนฺตฺวา สิตํ อคฺคมเหสึ กตฺวา อุภินฺนํปิ อภิเสกํ อกํสุ ฯ เอวํ อภิเสกํ ปตฺโต มหาสตฺโต อลงฺกตรเถ ฐตฺวา มหนฺเตน ปริวาเรน นครํ ปวิสิตฺวา ปทกฺขิณํ กตฺวา สุนนฺทนปาสาทวรสฺส มหาตลํ อภิรุยฺหิ ฯ ตโต ปฏฺฐาย โสฬสวสฺสสหสฺสานิ ธมฺเมน รชฺชํ กาเรตฺวา อายุหปริโยสาเน สคฺคปุรํ ปูเรสิ ฯ