พาราณสึ วิหรนฺติ พหู มํสํ สุโรทกํ ฯ

อโถปิ วาณิชา ผีตา นานารฏฺเฐหิ อาคตา

เตสุ เม วิหิตา รกฺขา เอวํ ชานาหุโปสถาติ ฯ

ตตฺถ น ราชปุตฺตาติ อหํ ราชปุตฺต กิญฺจิ ชนํ อยํนาม สมฺปตฺติ อิมสฺส มา โหตูติ น อุสฺสุยฺยามิ ฯ ตาทินนฺติ ตาทิลกฺขณยุตฺตานํ สมิตปาปตาย สมณานํ มหนฺตานํ สีลขนฺธาทีนํ คุณานํ เอสิตตาย มเหสินํ ธมฺมิกสมณานํ ปญฺจปติฏฺฐิเตน ปาเท วนฺทามิ ทานํ ททนฺโต ธมฺมิกญฺจ เนสํ รกฺขาวรณคุตฺตึ ปจฺจุปฏฺฐาเปนฺโต สกฺกจฺจนฺเต นมสฺสามิ มเนน สมฺปิยายนฺโตว ปูเชมีติ อตฺโถ ฯ เต มนฺติ เต สมณา มํ อยํ ธมฺมิกโกฏฺฐาเส ยุตฺตปยุตฺโต สุสฺสูสมนุสฺสุยฺยโกติ ตตฺถุโต ญตฺวา มํ ธมฺมคุณสํยุตฺตํ สุสฺสุสํ อนุสฺสุยฺยกํ อนุสาสนฺติ อิทํ กริ อิทํ มา กรีติ โอวทนฺตีติ อตฺโถ ฯ เตสาหนฺติ เตสํ อหํ ฯ หตฺถาโรหาติ หตฺถึ อารุยฺห ยุชฺฌนโยธา ฯ อนีกฏฺฐาติ หตฺถานีกาทีสุ ฐิตา ฯ รถิกาติ รถโยธา ฯ ปตฺติการกาติ ปตฺติโนว ฯ นิพฺพิตฺถนฺติ ยํ เตหิ สชฺชิตํ ภตฺตญฺจ เวตฺตนญฺจ อหํ ตํ นปฺปฏิพนฺธามิ อปริหาเปตฺวา ททามีติ อตฺโถ ฯ มหามตฺตาติ ภาติก มยฺหํ มหาปญฺญา มนฺเตสุ กุสลา มหาอมจฺจาเจว อวเสสมนฺติโน จ ปริจาริกา อตฺถิ ฯ อิมินา อิทํ ทสฺเสติ ตุมฺเห มนฺตสมฺปนฺเน ปณฺฑิเต อาจริเย น ลภิตฺถ อมฺหากํ ปน อาจริโย ปณฺฑิโต อุปายกุสโล เต โน เสตจฺฉตฺเตน โยเชสุนฺติ ฯ พาราณสินฺติ ภาติก มม ฉตฺตํ อุสฺสาปิตกาลโต ปฏฺฐาย อมฺหากํ ราชา ธมฺมิโก อฑฺฒมาสํ เทโว วสฺสติ นานาสสฺสานิ สมฺปชฺชนฺตีติ พาราณสิยํ พหุํ ขาทิตพฺพยุตฺตกํ มจฺฉมํสํ ปาตพฺพยุตฺตกํ สุโรทกํ ชานนฺติ ฯ เอวํ นครวาสิโน พหุํ มจฺฉมํสํ สุโรทกํ กตฺวา พาราณสึ วิหรนฺติ ฯ ผีตาติ หตฺถิรตนอสฺสรตนมุตฺตารตนาทีนิ อาหริตฺวา นิรุปทฺทวา โวหารํ กโรนฺตา ผีตา สมิทฺธา ฯ เอวํ ชานาหีติ ภาติก อุโปสถ อหํ อิเมหิ เอตฺตเกหิ การเณหิ สพฺพกนิฏฺโฐปิ หุตฺวา มม ภาติเก อภิภวิตฺวา เสตจฺฉตฺตํ ปตฺโต เอวํ ชานาหีติ ฯ