อตีเต พาราณสิยํ พฺรหฺมทตฺโตนาม ราชา ทสราชธมฺเม อโกเปตฺวา ธมฺเมน รชฺชํ กาเรนฺโต เอกทิวสํ จินฺเตสิ ชมฺพูทีปตเล ราชาโน พหุถมฺเภสุ ปาสาเทสุ วสนฺติ ตสฺมา พหูหิ ถมฺเภหิ ปาสาทกรณํนาม อนจฺฉริยํ ยนฺนูนาหํ เอกถมฺภํ ปาสาทํ กเรยฺยํ เอวํ สพฺพราชูนํ อคฺคราชา ภวิสฺสามีติ ฯ โส วฑฺฒกึ ปกฺโกสาเปตฺวา มยฺหํ โสภคฺคปฺปตฺตํ เอกถมฺภกํ ปาสาทํ กโรถาติ อาห ฯ เต สาธูติ สมฺปฏิจฺฉิตฺวา อรญฺญํ ปวิสิตฺวา อุชุมหนฺเต เอกถมฺภกปาสาทารเห พหู รุกฺเข ทิสฺวา อิเม รุกฺขา สนฺติ มคฺโค ปน วิสโม น สกฺกา โอตาเรตุํ รญฺโญ อาจิกฺขิสฺสามาติ จินฺเตตฺวา ตถา อกํสุ ฯ ราชา เยน เกนจิ อุปาเยน สณิกํ โอตาเรถาติ วตฺวา เทว เกนจิ อุปาเยน น สกฺกาติ วุตฺเต เตนหิ มม อุยฺยาเน เอกํ รุกฺขํ อุปธาเรถาติ อาห ฯ วฑฺฒกี อุยฺยานํ คนฺตฺวา เอกํ สุชาตํ อุชุกํ คามนิคมปูชิตํ ราชกุลโตปิ ลทฺธพลิกมฺมํ มงฺคลสาลรุกฺขํ ทิสฺวา รญฺโญ สนฺติกํ คนฺตฺวา ตมตฺถํ อาโรเจสุํ ฯ ราชา อุยฺยาเน รุกฺโขนาม มม ปฏิลทฺโธ คจฺฉถ ตํ ฉินฺทถาติ อาห ฯ เต สาธูติ สมฺปฏิจฺฉิตฺวา คนฺธมาลาทิหตฺถา อุยฺยานํ คนฺตฺวา รุกฺเข คนฺธปญฺจงฺคุลิกํ ทตฺวา สุตฺเตน ปริกฺขิปิตฺวา ปุปฺผกณฺณิกํ พนฺธิตฺวา ทีปํ ชาเลตฺวา พลิกมฺมํ กตฺวา อิโต สตฺตเม ทิวเส อาคนฺตฺวา รุกฺขํ ฉินฺทิสฺสาม ราชา เฉทาเปสิ อิมสฺมึ รุกฺเข นิพฺพตฺตเทวตา อญฺญตฺถ คจฺฉนฺตุ อมฺหากํ โทโส นตฺถีติ สาเวสุํ ฯ อถ ตสฺมึ นิพฺพตฺตเทวตา ตํ วจนํ สุตฺวา นิสฺสํสยํ อิเม วฑฺฒกี อิมํ รุกฺขํ ฉินฺทิสฺสนฺติ วิมานํ เม นสฺสิสฺสติ วิมานปริยนฺติกเมว โข ปน มยฺหํ ชีวิตํ อิมญฺจ รุกฺขํ ปริวาเรตฺวา ฐิเตสุ ตรุณสาลรุกฺเขสุ นิพฺพตฺตานํ มม ญาติเทวตานํปิ พหูนิ วิมานานิ นสฺสิสฺสนฺติ น โข ปน มํ ตถา อตฺตโน วินาโส พาธติ ยถา ญาตีนํ ตสฺมา มยา เนสํ ชีวิตทานํ ทาตุํ วฏฺฏตีติ จินฺเตตฺวา อฑฺฒรตฺติกสมเย ทิพฺพาลงฺการปฏิมณฺฑิโต รญฺโญ สิริคพฺภํ ปวิสิตฺวา สกลคพฺภํ เอโกภาสํ กตฺวา อุสฺสีสกปสฺเส โรทมาโน อฏฺฐาสิ ฯ ราชา ตํ ทิสฺวา ภีตตสิโต เตน สทฺธึ สลฺลปนฺโต ปฐมํ คาถมาห

กา ตฺวํ สุทฺเธหิ วตฺเถหิ อเฆ เวหาสยํ ฐิตา

เกน ตฺยสฺสูนิ วตฺตนฺติ กุโต ตํ ภยมาคตนฺติ ฯ

ตตฺถ กา ตฺวนฺติ นาคยกฺขสุปณฺณสกฺกาทีสุ กานาม ตฺวนฺติ ปุจฺฉติ ฯ วตฺเถหีติ วจนมตฺตเมเวตํ ฯ สพฺเพปิ ปน ทิพฺพาลงฺกาเร สนฺธาเยวมาห ฯ อเฆติ อปฺปฏิเฆ อากาเส ฯ เวหาสยนฺติ ตสฺเสว เววจนํ ฯ เกน ตฺยสฺสูนีติ เกน การเณน ตว อสฺสูนิ ปวตฺตนฺติ ฯ กุโตติ ญาติวิโยคธนวินาสาทีนํ กึ นิสฺสาย ตํ ภยมาคตนฺติ ปุจฺฉติ ฯ ตํ สุตฺวา เทวราชา เทฺว คาถา อภาสิ