สพฺโพว โลโก เอกโต อิตฺถี จ อยเมกิกา

เตนาหํ ปฏิปชฺชิสฺสํ คจฺฉถ ปกฺขิเปถ นนฺติ ฯ

ตตฺถ เตนาหนฺติ เยน การเณน สพฺโพ โลโก เอกโต กุมารสฺส ปกฺโข หุตฺวา ฐิโต อยญฺจ อิตฺถี เอกิกาว เตน การเณนาหํ อิมิสฺสา วจนํ ปฏิปชฺชิสฺสํ คจฺฉถ นํ ปพฺพตํ อาโรเปตฺวา ปปาเต ขิปถาติ ฯ

เอวํ วุตฺเต โสฬสสหสฺสาสุ ราชิตฺถีสุ เอกาปิ สกภาเวน สณฺฐาเรตุํ นาสกฺขิ ฯ สกลนครวาสิโน พาหา ปคฺคยฺห กนฺทิตฺวา เกเส วิกิริยมานา วิลปึสุ ฯ ราชา อิเม อิมสฺส ปปาตขิปนํ ปฏิพาเหยฺยุนฺติ สปริวาโร คนฺตฺวา มหาชนสฺส ปริเทวนฺตสฺเสว นํ อุทฺธปาทํ อโธสิรํ คาหาเปตฺวา ปปาเต ขิปาเปสิ ฯ อถสฺส เมตฺตาภาวนานุภาเวน ปพฺพเต อธิวตฺถา เทวตา มา ภายิ มหาปทุมาติ ตํ สมสฺสาเสตฺวา อุโภหิ หตฺเถหิ คเหตฺวา หทเย ฐเปตฺวา ทิพฺพสมฺผสฺสํ ผราเปตฺวา โอตริตฺวา ปพฺพตปาทปติฏฺฐิต- นาคภวเน นาคราชสฺส ผณคพฺเภ ฐเปสิ ฯ นาคราชา โพธิสตฺตํ นาคภวนํ เนตฺวา อตฺตโน ยสํ มชฺเฌ ภินฺทิตฺวา อทาสิ ฯ โส ตตฺถ เอกสํวจฺฉรํ วสิตฺวา มนุสฺสปถํ คมิสฺสามีติ วตฺวา กตรํ ฐานนฺติ วุตฺเต หิมวนฺตํ คนฺตฺวา ปพฺพชิสฺสามีติ อาห ฯ นาคราชา สาธูติ ตํ คเหตฺวา มนุสฺสปเถ ปติฏฺฐเปตฺวา ปพฺพชิตปริกฺขาเร ทตฺวา สกฏฺฐานเมว คโต ฯ โสปิ หิมวนฺตํ ปวิสิตฺวา อิสิปพฺพชฺชํ ปพฺพชิตฺวา ฌานาภิญฺญา นิพฺพตฺเตตฺวา วนมูลผลาหาโร ตตฺถ ปฏิวสติ ฯ อเถโก พาราณสิวาสี วนจรโก ตํ ฐานํ ปตฺโต มหาสตฺตํ สญฺชานิตฺวา นนุ ตฺวํ เทว มหาปทุมกุมาโรติ วตฺวา อาม สมฺมาติ วุตฺเต ตํ วนฺทิตฺวา กติปาหํ ตตฺถ วสิตฺวา พาราณสึ คนฺตฺวา รญฺโญ อาโรเจสิ เทว ปุตฺโต เต หิมวนฺตํปฺปเทเส อิสิปพฺพชฺชํ ปพฺพชิตฺวา ปณฺณสาลายํ วสติ อหํ ตสฺส สนฺติเก วสิตฺวา อาคโตติ ฯ สุปจฺจกฺขโต เต ทิฏฺโฐติ ฯ อาม เทวาติ ฯ ราชา มหาพลกายปริวุโต ตตฺถ คนฺตฺวา วนปริยนฺเต ขนฺธาวารํ พนฺธิตฺวา อมจฺจปริวุโต ปณฺณสาลํ คนฺตฺวา กาญฺจนรูปกํ วิย ปชฺชลนฺตํ สิริยา ปณฺณสาลทฺวาเร นิสินฺนํ มหาสตฺตํ ทิสฺวา วนฺทิตฺวา เอกมนฺตํ นิสีทิ ฯ อมจฺจา วนฺทิตฺวา ปฏิสนฺถารํ กตฺวา นิสีทึสุ ฯ โพธิสตฺโต ราชานํ ผเลน ปฏิปุจฺฉิตฺวา ปฏิสนฺถารํ อกาสิ ฯ อถ นํ ราชา ตาต มยา ตฺวํ คมฺภีเร ปปาเต ขิปาปิโต กถํ สชีวิโตสีติ ปุจฺฉนฺโต นวมํ คาถมาห