เอวํ เจ โน วิหรตํ อนฺตราโย น เหสฺสติ

ตุยฺหํ วาปิ มหาราช มยฺหํ วา รฏฺฐวฑฺฒน

อปฺเปวนาม ปสฺเสม อโหรตฺตานมจฺจเยติ ฯ

ตตฺถ เอวํ เจ โนติ มหาราช มา จินฺตยิตฺถ สเจ อมฺหากํเยว วิหรนฺตานํ ชีวิตนฺตราโย น ภวิสฺสติ อปฺเปวนาม อุโภปิ อญฺญมญฺญํ ปสฺสิสฺสาม อปิจ ตฺวํ มยา ทินฺนํ โอวาทเมว มม ฐาเน ฐเปตฺวา เอวํ อิตรชีวิเต โลกสนฺนิวาเส อปฺปมตฺโต หุตฺวา ทานาทีนิ ปุญฺญานิ กโรนฺโต ทสราชธมฺเม อโกเปตฺวา ธมฺเมน รชฺชํ กาเรหิ เอวํ หิ เม โอวาทํ กโรนฺโต มํ ปสฺสิสฺสสิเยวาติ ฯ