อตีเต พาราณสิยํ พฺรหฺมทตฺเต รชฺชํ กาเรนฺเต ตสฺส ปุโรหิโต ปิงฺคโล นิกฺขนฺตทาโฒ อโหสิ ฯ ตสฺส พฺราหฺมณี อญฺเญน พฺราหฺมเณน สทฺธึ อติจริ ฯ โสปิ ตาทิโสว ฯ ปุโรหิโต พฺราหฺมณึ ปุนปฺปุนํ วาเรนฺโตปิ วาเรตุํ อสกฺโกนฺโต จินฺเตสิ อิมํ มม เวรึ สหตฺถา มาเรตุํ น สกฺกา อุปาเยน นํ มาเรสฺสามีติ ฯ โส ราชานํ อุปสงฺกมิตฺวา อาห มหาราช ตว นครํ สกลชมฺพูทีเป อคฺคนครํ ตฺวํ อคฺคราชา เอวํ อคฺครญฺโญนาม ตว ทกฺขิณทฺวารํ ทุยุตฺตํ อวมงฺคลนฺติ ฯ อาจริย อิทานิ กึ กาตพฺพนฺติ ฯ มงฺคลํ โยเชตพฺพนฺติ ฯ กึ ลทฺธุํ วฏฺฏตีติ ฯ ปุราณทฺวารํ หาเรตฺวา มงฺคลยุตฺตานิ ทารูนิ คเหตฺวา นครปริคฺคาหกานํ ภูตานํ พลึ ทตฺวา มงฺคลนกฺขตฺเตน ปติฏฺฐาเปตุํ วฏฺฏตีติ ฯ เตนหิ เอวํ กโรถาติ ฯ ตทา โพธิสตฺโต ตกฺการิโยนาม มาณโว หุตฺวา ตสฺส สนฺติเก สิปฺปํ อุคฺคณฺหาติ ฯ ปุโรหิโต ปุราณทฺวารํ หาเรตฺวา นวํ ปติฏฺฐาเปตฺวา ราชานํ อาห นิฏฺฐิตํ เทว ทฺวารํ เสฺว ภทฺทกนกฺขตฺตํ ตํ อนติกฺกมิตฺวา พลึ กตฺวา ทฺวารํ ปติฏฺฐาเปตุํ วฏฺฏตีติ ฯ เตนหิ อาจริย พลิกมฺมตฺถาย กึ ลทฺธุํ วฏฺฏตีติ ฯ เทว มเหสกฺขํ ทฺวารํ มเหสกฺขเทวตาหิ ปริคฺคหิตํ เอกํ ปิงฺคลํ นิกฺขนฺตทาฒํ อุภโต วิสุทฺธํ พฺราหฺมณํ มาเรตฺวา ตสฺส มํสโลหิเตน พลึ กตฺวา สรีรํ เหฏฺฐา ขิปิตฺวา ทฺวารํ ปติฏฺฐาเปตพฺพํ เอวํ ตุมฺหากญฺจ นครสฺส จ โสตฺถิ ภวิสฺสตีติ ฯ สาธุ อาจริย เอวรูปํ พฺราหฺมณํ มาเรตฺวา ทฺวารํ ปติฏฺฐาเปหีติ ฯ โส ตุฏฺฐมานโส เสว ปจฺจามิตฺตสฺส ปิฏฺฐึ ปสฺสิสฺสามีติ อุสฺสาหชาโต อตฺตโน เคหํ คนฺตฺวา มุขํ รกฺขิตุํ อสกฺโกนฺโต ตุริตตุริโต ภริยํ อาห ปาเป จณฺฑาลิ อิโต ปฏฺฐาย เกน สทฺธึ อภิรมิสฺสสิ เสฺว เต ชารํ มาเรตฺวา พลิกมฺมํ กริสฺสามีติ ฯ นิรปราธํ กึการณา มาเรสฺสสีติ ฯ ราชา กฬารปิงฺคลสฺส พฺราหฺมณสฺส มํสโลหิเตน พลิกมฺมํ กตฺวา นครทฺวารํ ปติฏฺฐาเปหีติ อาห ชาโร จ เต กฬารปิงฺคโล ตํ มาเรตฺวา พลิกมฺมํ กริสฺสามีติ ฯ สา ชารสฺส สนฺติกํ สาสนํ ปาเหสิ ราชา กิร กฬารปิงฺคลํ พฺราหฺมณํ มาเรตฺวา พลึ กาตุกาโม สเจ ชีวิตุกาโม อญฺเญปิ ตยา สทิเส พฺราหฺมเณ คเหตฺวา สกาลสฺเสว ปลายสฺสูติ ฯ โส ตถา อกาสิ ฯ ตํ นคเร ปากฏํ อโหสิ ฯ สกลนครโต สพฺเพ กฬารปิงฺคลา ปลายึสุ ฯ ปุโรหิโต อมิตฺตสฺส ปลาตภาวํ อชานิตฺวา ปาโตว ราชานํ อุปสงฺกมิตฺวา เทว อสุกฏฺฐาเน กฬารปิงฺคโล พฺราหฺมโณ อตฺถิ ตํ คณฺหาเปถาติ อาห ฯ ราชา อมจฺเจ เปเสสิ ฯ เต ตํ อปสฺสนฺตา อาคนฺตฺวา ปลาโต กิราติ อาโรเจสุํ ฯ อญฺญตฺถ อุปธาเรถาติ ฯ สกลนคเร อุปธาเรนฺตาปิ น ปสฺสึสุ ฯ ตโต อญฺญํ อุปธาเรถาติ วุตฺเต เทว ฐเปตฺวา ปุโรหิตํ อญฺโญ เอวรูโป นตฺถีติ วทึสุ ฯ ปุโรหิตํ น สกฺกา มาเรตุนฺติ ฯ เทว กึ วเทถ ปุโรหิตสฺส การณา อชฺช ทฺวาเร อปติฏฺฐาปิเต นครํ อคุตฺตํ ภวิสฺสติ อาจริโย กเถนฺโต อชฺช อติกฺกมิตฺวา อิโต สํวจฺฉรจฺจเยน นกฺขตฺตํ ลภิสฺสสีติ กเถสิ สํวจฺฉรํ นคเร อทฺวารเก ปจฺจตฺถิกานํ โอกาโส ภวิสฺสติ อิมํ มาเรตฺวา อญฺเญน พฺยตฺเตน พฺราหฺมเณน พลิกมฺมํ กาเรตฺวา ทฺวารํ ปติฏฺฐาเปสฺสามาติ ฯ อตฺถิ ปนญฺโญ อาจริยสทิโส ปณฺฑิตพฺราหฺมโณติ ฯ อตฺถิ เทว ตสฺเสว อนฺเตวาสิโก ตกฺการิยมาณโวนาม ตสฺส ปุโรหิตฏฺฐานํ ทตฺวา มงฺคลํ กโรถาติ ฯ ราชา ตํ ปกฺโกสาเปตฺวา สมฺมานํ กาเรตฺวา ปุโรหิตฏฺฐานํ ทตฺวา ตถา กาตุํ อาณาเปสิ ฯ โส มหนฺเตน ปริวาเรน นครทฺวารํ อคมาสิ ฯ ปุโรหิตํ ราชานุภาเวน พนฺธิตฺวา อานยึสุ ฯ มหาสตฺโต ทฺวารฐปนฏฺฐาเน อาวาฏํ ขณาเปตฺวา สาณึ ปริกฺขิปาเปตฺวา อาจริเยน สทฺธึ อนฺโตสาณิยํ อฏฺฐาสิ ฯ อาจริโย อาวาฏํ โอโลเกนฺโต อตฺตโน ปติฏฺฐํ อลภนฺโต อนตฺโถ ตาว เม นิปฺผาทิโต อโหสิ พาลตาย ปน มุขํ รกฺขิตุํ อสหนฺโต เวเคน ปาปิตฺถิยา กเถสึ อตฺตนาว เม อตฺตโน วโธ อาภโตติ มหาสตฺตํ อาลปนฺโต ปฐมํ คาถมาห