ปชฺชุนฺนนาถา ปสโว ปสุนาถา อยํ ปชา

ตฺวํ นาโถสิ มหาราช อมฺหนาถา มม ภริยา

ทฺวินฺนมญฺญตรํ ญตฺวา มุตฺโต คจฺเฉยฺยปพฺพตนฺติ

ตตฺถ ปชฺชุนฺนนาถาติ ติณภกฺขา ปสโว เมฆนาถานาม ฯ ปสุนาถา อยํ ปชาติ อยํ ปน มนุสฺสปชา ปญฺจโครเสหิ อุปชีวนฺตี ปสุนาถา ปสุปติฏฺฐา ฯ ตฺวํ นาโถสีติ ตฺวํ มม ปติฏฺฐา อสิ ฯ อมฺหนาถา มม ภริยาติ อหมสฺสา ปติฏฺฐา ฯ ทฺวินฺนมญฺญตรํ ญตฺวา มุตฺโต คจฺเฉยฺย ปพฺพตนฺติ อมฺหากํ ทฺวินฺนํ อนฺตเร เอโก เอกํ มตํ ญตฺวา สยํ มรณโต มุตฺโต ปจฺฉา หิมวนฺตํ คจฺเฉยฺย ชีวมานา มยํ อญฺญมญฺญํ น ชหาม ตสฺมา สเจปิ อิมํ หิมวนฺตํ เปเสตุกาโม มํ ปฐมํ มาเรตฺวา ปจฺฉา เปเสหีติ ฯ