ราชา กินฺนเร สุวณฺณปญฺชเร นิสีทาเปตฺวา ตเมว ลุทฺทกํ ปกฺโกสาเปตฺวา คจฺฉ อิเม คหิตฏฺฐาเนเยว วิสชฺเชหีติ วิสชฺชาเปสิ ฯ

มหาสตฺโตปิ ปสฺสาจริย เอวํ กินฺนรา วาจํ รกฺขิตฺวา ปตฺตกาเล กถิเตน สุภาสิเตเนว มุตฺตา ตฺวมฺปน ทุกฺกถิเตน มหาทุกฺขํ ปตฺโตติ อิทํ อุทาหรณํ ทสฺเสตฺวา อาจริย มา ภายิ ชีวิตํ เต ทสฺสามีติ อสฺสาเสสิ อปิจ โข ปน ตุมฺเห มํ รกฺเขยฺยาถาติ วุตฺเต น ตาว นกฺขตฺตโยโค ลพฺภตีติ ตํทิวสํ วีตินาเมตฺวา มชฺฌิมยามสมนนฺตเร มตํ เอฬกํ อาหราเปตฺวา พฺราหฺมณ ยตฺถ กตฺถจิ คนฺตฺวา ชีวาหีติ กญฺจิ อชานาเปนฺโต อุยฺโยเชตฺวา เอฬกมํเสน พลึ กตฺวา ทฺวารํ ปติฏฺฐาเปสิ ฯ

สตฺถา อิมํ ธมฺมเทสนํ อาหริตฺวา น ภิกฺขเว อิทาเนว ปุพฺเพปิ โกกาลิโก วาจาย หโตเยวาติ วตฺวา ชาตกํ สโมธาเนสิ ตทา กฬารปิงฺคโล โกกาลิโก อโหสิ ตกฺการิยปณฺฑิโต ปน อหเมวาติ ฯ

ตกฺการิยชาตกํ อฏฺฐมํ ฯ