ราชา ตสฺส มธุรกถาย พชฺฌิตฺวา ธนุํ โอตาเรตฺวา คารเวน อฏฺฐาสิ ฯ มหาสตฺโตปิ ราชานํ อุปสงฺกมิตฺวา มธุรปฏิสนฺถารํ กตฺวา เอกมนฺตํ อฏฺฐาสิ ฯ มหาชโนปิ สพฺพาวุธานิ ฉฑฺเฑตฺวา อาคนฺตฺวา ราชานํ ปริวาเรสิ ฯ ตสฺมึ ขเณ มหาสตฺโต สุวณฺณกิงฺกิณิกํ จาเลนฺโตวิย มธุรสเรน ราชานํ ปุจฺฉิ

อาคเมหิ มหาราช มา มํ วิชฺฌ รเถสภ

โก นุ เต อิทมกฺขาสิ เอตฺเถโส ติฏฺฐติ มิโคติ ฯ

ตสฺมึ ขเณ ปาปปุริโส โถกํ ปฏิกฺกมิตฺวา ตตฺเถว อฏฺฐาสิ ฯ ราชา อิมินา เม ตฺวํ ทสฺสิโตติ กเถนฺโต ฉฏฺฐํ คาถมาห