ตํ สุตฺวา ราชา มิคราชา มา มํ เอวํ อมญฺญิ อหํ หิ รชฺชํ ชหนฺโตปิ ตุยฺหํ ทินฺนํ วรํ น ชหิสฺสํ สทฺทหถ มยฺหํ วรํ คณฺหาติ ฯ มหาสตฺโต ตสฺส สนฺติกา วรํ คณฺหนฺโต อตฺตานํ อาทึ กตฺวา สพฺพสตฺตานํ อภยทานํ วรํ คณฺหิ ฯ ราชาปิ วรํ ทตฺวา โพธิสตฺตํ นครํ เนตฺวา นครญฺจ มหาสตฺตญฺจ อลงฺการาเปตฺวา เทวิยา ธมฺมํ เทสาเปสิ ฯ มหาสตฺโต เทวึ อาทึ กตฺวา รญฺโญ จ ราชปริสาย จ มธุราย มนุสฺสภาสาย ธมฺมํ เทเสตฺวา ราชานํ ทสหิ ราชธมฺเมหิ โอวทิตฺวา มหาชนํ อนุสาเสตฺวา อรญฺญํ ปวิสิตฺวา มิคคณปริวุโต วาสํ กปฺเปสิ ฯ ราชา สพฺพสตฺตานํ อภยํ ทมฺมีติ นคเร เภริญฺจาราเปสิ ฯ ตโต ปฏฺฐาย มิคปกฺขีนํ โกจิ หตฺถํ ปสาเรตุํ สมตฺโถนาม นาโหสิ ฯ มิคคโณ มนุสฺสานํ สสฺสานิ ขาทติ ฯ โกจิ วาเรตุํ น สกฺโกติ ฯ มหาชโน ราชงฺคณํ คนฺตฺวา อุปกฺโกสิ ฯ

ตมตฺถํ ปกาเสนฺโต สตฺถา อิมํ คาถมาห

สมาคตา ชานปทา เนคมา จ สมาคตา

มิคา ธญฺญานิ ขาทนฺติ ตํ เทโว ปฏิเสธตูติ ฯ