ตตฺถ สมฺปนฺนนฺติ ปริปุณฺณํ อเวกลฺลํ ฯ สาลิเกทารนฺติ สาลิเขตฺตํ ฯ สพฺพสุนฺทโรติ สพฺเพหิ โกฏฺฐาเสหิ สุนฺทโร รตฺตตุณฺโฑ ชิญฺชุกสนฺนิภกฺขิ รตฺตปาโท ตีหิ รตฺตราชีหิ ปริกฺขิตฺตคีโว มหามยุรปฺปมาโณ โส ยาวทตฺถํ สาลึ ขาทิตฺวา อญฺญํ ตุณฺเฑน คเหตฺวา คจฺฉตีติ ฯ

พฺราหฺมโณ ตสฺส กถํ สุตฺวา สุวราเช สิเนหํ อุปฺปาเทตฺวา เขตฺตปาลํ ปุจฺฉิ อมฺโภ ปุริส ปาสํ โอเฑตุํ ชานาสีติ ฯ อาม ชานามีติ ฯ อถ นํ คาถาย อชฺฌภาสิ

อุชฺฌนฺตุ พาลปาสานิ ยถา พชฺเฌถ โส ทิโช

ชีวญฺจ นํ คเหตฺวาน อานเยหิ มมนฺติเกติ ฯ