ตตฺถ อุชฺฌนฺตูติ โอฑยนฺตุ ฯ พาลปาสานีติ อสฺสวาลาทิรชฺชุ- มยปาสานิ ฯ ชีวญฺจ นนฺติ ชีวิตํเยว นนฺติ ฯ

ตํ สุตฺวา เขตฺตปาโล สาลึ อคฺฆาเปตฺวา อิณสฺส อกตภาเวน ตุฏฺโฐ คนฺตฺวา อสฺสปาเส วตฺเตตฺวา อชฺช อิมสฺมึ ฐาเน โอตริสฺสตีติ สุวรญฺโญ โอตรณฏฺฐานํ สลฺลกฺเขตฺวา ปุนทิวเส ปาโตว วาตปฺปหาเรน จรณกํ อกตฺวา ปาสํ โอเฑตฺวา สุวานํ อาคมนํ โอโลเกนฺโต กุฏิยํ นิสีทิ ฯ สุวราชาปิ สุวคณปริวุโต อาคนฺตฺวา อโลลุปฺปจารตาย หีโย ขาทิตฏฺฐาเน โอฑิตปาเส ปาทํ ปเวเสนฺโตว โอตริ ฯ โส อตฺตโน พทฺธภาวํ ญตฺวา จินฺเตสิ สจาหํ อิทานิ พทฺธรวํ รวิสฺสามิ ญาตกา เม มรณภยตชฺชิตา โคจรํ อคเหตฺวา ปลายิสฺสนฺติ ยาว เอเตสํ โคจรคหณํ ตาว อธิวาเสสฺสามีติ ฯ โส เตสํ สุหิตภาวํ ญตฺวา มรณภยตชฺชิโต หุตฺวา ติกฺขตฺตุํ พทฺธรวํ รวิ ฯ อถ สพฺเพ สุตฺวา ปลายึสุ ฯ สุวราชา เอโก เม ญาตีสุ นิวตฺติตฺวา โอโลเกนฺโตปิ นตฺถิ กึ นุโข มยา ปาปํ กตนฺติ วิลปนฺโต คาถมาห

เอเต ภุตฺวา ปิวิตฺวา จ ปกฺกมนฺติ วิหงฺคมา

เอโก พทฺโธสฺมิ ปาเสน กึ ปาปํ ปกตํ มยาติ ฯ