๓ กุรุงฺควคฺควณฺณนา

๑ กุรุงฺคมิคชาตกํ

ญาตเมตํ กุรุงฺคสฺสาติ อิทํ สตฺถา เวฬุวเน วิหรนฺโต เทวทตฺตํ อารพฺภ กเถสิ ฯ

เอกสฺมึ หิ สมเย ธมฺมสภายํ สนฺนิปติตฺวา ภิกฺขู อาวุโส เทวทตฺโต ตถาคตสฺส ฆาตนตฺถาย ธนุคฺคเห ปโยเชสิ สิลํ ปวิชฺฌิ ธนปาลกํ วิสฺสชฺเชสิ สพฺพทาปิ ทสพลสฺส วธาย ปริสกฺกตีติ เทวทตฺตสฺส อวณฺณํ กเถนฺตา นิสีทึสุ ฯ สตฺถา อาคนฺตฺวา ปญฺญตฺตาสเน นิสินฺโน กาย นุตฺถ ภิกฺขเว เอตรหิ กถาย สนฺนิสินฺนาติ ปุจฺฉิ ฯ ภนฺเต เทวทตฺโต ตุมฺหากํ วธาย ปริสกฺกตีติ เทวทตฺตสฺส อคุณกถาย สนฺนิสินฺนมฺหาติ ฯ สตฺถา น ภิกฺขเว เทวทตฺโต อิทาเนว มม วธาย ปริสกฺกติ ปุพฺเพปิ ปริสกฺกติเยว น จ ปน มํ วธิตุํ อสกฺขีติ วตฺวา อตีตํ อาหริ ฯ