สหสฺสเวโทปิ น ตํ ปฏิจฺจ

ทุกฺขา ปมุญฺเจ จรณํ อปตฺวาติ ฯ

ตตฺถ พหุสฺสุโตติ สเจ มหาราช อหํ พหุสฺสุโตมฺหีติ ปคุณเวโทปิ ทสกุสลธมฺมํ น จเรยฺย ตีหิ ทฺวาเรหิ ปาปาเนว กเรยฺย ติฏฺฐนฺตุ ตโย เวทา สหสฺสเวทาปิ สมานา ตํ พาหุสจฺจํ ปฏิจฺจ อฏฺฐสมาปตฺติสงฺขาตํ จรณํ อปตฺวา อปายทุกฺขโต น มุจฺเจยฺยาติ ฯ

ตสฺส ตํ วจนํ สุตฺวา อุทฺทาลโก จินฺเตสิ ราชา ยถา วา ตถา วา อิสิคณสฺส ปสีทิ อยํ ปน พฺราหฺมโณ จรนฺตํ โคณํ ทณฺเฑน ปหรติ วฑฺฒิตภตฺเต กจวรํ ขิปติ กเถสฺสามิ เตน สทฺธินฺติ กเถนฺโต ตติยํ คาถมาห