ตตฺถ มเหสีติ อคฺคมเหสี ฯ รุจิโนติ สุรุจิสฺส รญฺโญ ฯ ปฐมนฺติ โสฬสนฺนํ อิตฺถีสหสฺสานํ สพฺพปฐมํ ฯ ยํ มนฺติ ยสฺมึ กาเล สุขสํวาสาย มํ สุรุจิ อานยิ ตโต ปฏฺฐาย อหํ ทส วสฺสสหสฺสานิ เอกิกาว อิมสฺมึ เคเห วสึ ฯ อติมญฺญิตฺถาติ มุหุตฺตมฺปิ สมฺมุขา วา ปรมฺมุขา วา อติกฺกมิตฺวา มญฺญินฺติ น อภิชานามิ น สรามิ ฯ อิเสติ ตํ อาลปติ ฯ เต มนฺติ สสฺสุโร จ สสฺสุ จาติ เต อุโภปิ มํ ฯ วิเนตาโรติ เตหิ วินีตมฺหิ เต มม ยาว ชีวึสุ ตาว โอวาทมทํสุ ฯ อหึสารตินีติ อหึสาสงฺขาตาย อรติยา สมนฺนาคตา มยา หิ กุณฺฐกิปิลฺลิกาทิ โกจิ น หึสิตปุพฺโพ ฯ กามสาติ เอกนฺเตเนว ฯ ธมฺมจารินีติ ทสกุสลกมฺมปเถสุ ปูเรมิ ฯ อุปฏฺฐาสินฺติ ปาทปริกมฺมาทีนิ กิจฺจานิ กโรนฺตี อุปฏฺฐหึ ฯ สหภริยานีติ มยา สห เอกสามิกสฺส ภริยาภูตานิ ฯ นาหูติ กิเลสํ นิสฺสาย อิสฺสาธมฺโม วา โกธธมฺโม วา มยฺหํ น ภูตปุพฺโพ ฯ หิเตนาติ ยํ ตาสํ หิตํ เตเนว นนฺทามิ อุเร ปุตฺตธีตโรวิย ตา ทิสฺวา ตุสฺสามิ ฯ กาจีติ ตาสุ เอกาปิ มยฺหํ อปฺปิยานาม นตฺถิ สพฺพาปิ ทยาตาเยว ฯ อนุกมฺปามีติ มุทุจิตฺเตน ตานิ สพฺพานิ โสฬสสหสฺสานิปิ อตฺตานํวิย อนุกมฺปามิ ฯ สหธมฺเมนาติ เยน การเณน โย ยํ กาตุํ สกฺโกติ สา ตํ ตสฺมึ กมฺเม ปโยเชมีติ อตฺโถ ฯ ปมุทิตินฺทฺริยาติ เปเสนฺตี นิจฺจํ ปมุทิตินฺทฺริยาว หุตฺวา เปเสมิ อเร ทุฏฺฐทาสิ อิทํนาม กโรหีติ เอวํ กุชฺฌิตฺวา น เม โกจิ กตฺถจิ เปสิตปุพฺโพ ฯ ปยตปาณินีติ โธตหตฺถา ปสาริตหตฺถาว หุตฺวา ฯ ปาริหาริยปกฺขญฺจาติ ปญฺจมี อฏฺฐมี จาตุทฺทสี ปณฺณรสีติ ปจฺจุคฺคมนานุคฺคมนวเสน จตฺตาโร ทิวสา ฯ สทาติ นิจฺจกาลํ ปญฺจสุ สีเลสุ สํวุตา เตหิ ปิหิตโคปิตตฺตภาวา โหมีติ ฯ

เอวํ ตสฺสา คาถาสเตนปิ คาถาสหสฺเสนปิ วณฺณิยมานานํ คุณานํ ปมาณนฺนาม นตฺถิ ฯ ตาย ปณฺณรสหิ คาถาหิ อตฺตโน คุณํ วณฺณิตกาเลเยว สกฺโก อตฺตโน พหุกรณียตาย ตสฺสา กถํ อวจฺฉินฺทิตฺวา อพฺภูตาเยว เต คุณาติ ตํ ปสํสนฺโต คาถทฺวยมาห

สพฺเพว เต ธมฺมคุณา ราชปุตฺติ ยสสฺสินิ

สํวิชฺชนฺติ ตยิ ภทฺเท เย ตฺวํ กิตฺเตสิ อตฺตนิ ฯ