ตตฺถ อนุชฺชุคามีติอาทีหิ ตํ อาลปติ ฯ จลกฺกกุโธติ จลมานกกุโธ ฯ ทุกฺขาภิตุนฺโนติ โส อุสโภ ทุกฺเขน อภิภูโต อาตุโร หุตฺวา ฯ พหูติ พหูนิ ฯ ปวิสฺสนฺติ ปาวิสึ ฯ รสฺมิโยติ สุริยรสฺมิโย ฯ นิกฺขมิสฺสนฺติ นิกฺขมึ ฯ กิปิลฺลิกานีติ อุปจิกาโย ฯ นิปฺโปถยนฺโตติ ขาทมาโน ฯ อติเหฬยาโนติ อติมญฺญนฺโต นินฺทนฺโต ครหนฺโต ฯ โกทณฺฑเกนาติ ธนุทณฺฑเกหิเจว มุคฺคเรหิ จ ฯ

เอวนฺเต จตฺตาโรปิ อตฺตโน อุโปสถกมฺมํ วณฺเณตฺวา อุฏฺฐาย มหาสตฺตํ วนฺทิตฺวา ภนฺเต ตุมฺเห อญฺเญสุ ทิวเสสุ อิมาย เวลาย ผลาผลตฺถาย คจฺฉถ อชฺช อคนฺตฺวา กสฺมา อุโปสถํ กริตฺถาติ ปุจฺฉนฺตา คาถมาหํสุ

ยํ โน อปุจฺฉิตฺถ ตุวํ ภทนฺเต

สพฺเพว พฺยากริมฺหา ยถาปชานํ