ตตฺถ ตสฺมาติ ยสฺมา โลภวสิกาว มหาวินาสํ ปตฺตา สตฺถวาโห อุตฺตมสมฺปตฺตึ ตสฺมา ฯ หเนยฺย ทิสกํ มนนฺติ อตฺตโน อุปฺปชฺชมานํ นานาวิธานํ โลภสตฺตานํ สนฺตกํ มนํ โลภสมฺปยุตฺตํ จิตฺตํ หเนยฺยาติ อตฺโถ ฯ เอวมาทีนวนฺติ เอวํ โลเภ อาทีนวํ ชานิตฺวา ฯ ตณฺหา ทุกฺขสฺส สมฺภวนฺติ ชาติอาทิทุกฺขสฺส สา จ ตณฺหา สมฺภโว ตโต เอวํ ตํ ทุกฺขํ นิพฺพตฺติ เอวํ ตณฺหาว ทุกฺขสฺส สมฺภวํ ญตฺวา วีตตณฺโห อนาทาโน มคฺเคนาคตาย สติยา สโต หุตฺวา ภิกฺขุ ฯ ปริพฺพเชติ อิริเยถ วตฺเตถาติ ฯ อรหตฺเตน เทสนาย กูฏํ คณฺหิ ฯ

อิมญฺจ ปน ธมฺมเทสนํ อาหริตฺวา เอวํ อุปาสกา ปุพฺเพ โลภวสิกา วาณิชา มหาวินาสํ ปตฺตา ตสฺมา โลภวสิเกหิ น ภวิตพฺพนฺติ วตฺวา สจฺจานิ ปกาเสตฺวา ชาตกํ สโมธาเนสิ (สจฺจปริโยสาเน เต วาณิชา โสตาปตฺติผเล ปติฏฺฐิตา) ตทา นาคราชา สารีปุตฺโต อโหสิ สตฺถวาโห ปน อหเมวาติ ฯ

มหาวาณิชชาตกํ ทสมํ ฯ