อพฺภูโต วต โลกสฺมึ อุปฺปชฺชิ โลมหํสโน

ทิพฺโพ รโถ ปาตุรหุ เวเทหสฺส ยสสฺสิโนติ ฯ

ตสฺสตฺโถ อพฺภูโต วต เตสํ อมฺหากํ ราชา โลกสฺมึ โลมหํสโน อุปฺปชฺชิ ยสฺส ทิพฺโพ รโถ ปาตุรโหสิ เวเทหสฺส ยสสฺสิโนติ ฯ

มาตลิ รถํ อาเนตฺวา มนุสฺเสสุ มาลาทีนิ ปูเชนฺเตสุ ติกฺขตฺตุํ นครํ ปทกฺขิณํ กตฺวา รญฺโญ นิเวสนทฺวารํ คนฺตฺวา รถํ นิวตฺเตตฺวา ปจฺฉาภาเคน สีหปญฺชรอุมฺมาเร ฐเปตฺวา อาโรหณสชฺชํ กตฺวา อฏฺฐาสิ ฯ ตํ ทิวสมฺปิ ราชา ทานสาลํ โอโลเกตฺวา อิมินา นิยาเมเนว ทานํ เทถาติ อาณาเปตฺวา อุโปสถํ สมาทาย ทิวสํ วีตินาเมตฺวา อมจฺจคณปริวุโต อลงฺกตมหาตเล ปาจีนสีหปญฺชราภิมุโข ธมฺมยุตฺตํ กถํ กเถนฺโต นิสินฺโน โหติ ฯ อถ นํ มาตลิ รถาภิรูหณตฺถํ นิมนฺเตตฺวา อาทาย อคมาสิ ฯ