อเถกทิวสํ เอโก สตฺถวาหปุตฺโต ปญฺจหิ สกฏสเตหิ วิสมติฏฺฐํ สมฺปตฺโต ฯ ตสฺส โคณา สกฏานิ อุตฺตาเรตุํ น สกฺโกนฺติ ฯ ปญฺจสุ สกฏสเตสุ โคณา ยุคปรมฺปราย โยชิตา เอกมฺปิ สกฏํ อุตฺตาเรตุํ นาสกฺขึสุ ฯ โพธิสตฺโตปิ คามโคเณหิ สทฺธึ ติฏฺฐสมีเป จรติ ฯ สตฺถวาหปุตฺโตปิ โคสุตฺตวิตฺตโก ฯ โส อตฺถิ นุ โข เอเตสํ คุนฺนมนฺตเร อิมานิ สกฏานิ อุตฺตาเรตุํ สมตฺโถ อุสภาชานีโยติ อุปธารยมาโน โพธิสตฺตํ ทิสฺวา อยํ อาชานีโย สิกฺขิสฺสติ มยฺหํ สกฏานิ อุตฺตาเรตุํ โก นุ โข อสฺส สามิโกติ โคปาลเก ปุจฺฉิ โก นุ โข โภ อิมสฺส สามิโก อหํ อิมํ สกเฏสุ โยเชตฺวา สกเฏสุ อุตฺตาริเตสุ เวตนํ ทสฺสามีติ ฯ เต อาหํสุ คเหตฺวา นํ โยเชถ นตฺถิ อิมสฺส อิมสฺมึ ฐาเน สามิโกติ ฯ โส ตํ นาสาย รชฺชุเกน พนฺธิตฺวา กฑฺฒนฺโต จาเลตุํปิ นาสกฺขิ ฯ โพธิสตฺโต กิร ภติยา กถิตาย คมิสฺสามีติ น อคมาสิ ฯ สตฺถวาหปุตฺโต ตสฺสาธิปฺปายํ ญตฺวา สามิ ตยา ปญฺจสุ สกฏสเตสุ อุตฺตาริเตสุ เอเกกสฺส สกฏสฺส เทฺว เทฺว กหาปเณ ภตึ กตฺวา สหสฺสํ ทสฺสามีติ อาห ฯ ตทา โพธิสตฺโต สยเมว อคมาสิ ฯ อถ นํ ปุริสา สกเฏสุ โยเชสุํ ฯ อถ นํ เอกเวเคเนว อุกฺขิปิตฺวา ถเล ปติฏฺฐาเปสิ เอเตนุปาเยน สพฺพสกฏานิ อุตฺตาเรสิ ฯ สตฺถวาหปุตฺโต เอเกกสฺส สกฏสฺส เอกํ กตฺวา ปญฺจ สตานิ ภณฺฑิกํ กตฺวา ตสฺส คเล พนฺธิ ฯ โส อยํ มยฺหํ ยถาปริจฺฉินฺนํ ภตึ น เทติ นทานิสฺส คนฺตุํ ทสฺสามีติ คนฺตฺวา สพฺพปุริมสฺส สกฏสฺส ปุรโต มคฺคํ นิวาเรตฺวา อฏฺฐาสิ ฯ อปเนตุํ วายมนฺตาปิ นํ อปเนตุํ นาสกฺขึสุ ฯ สตฺถวาหปุตฺโต ชานาติ มญฺเญ เอส อตฺตโน ภติยา โอนภาวนฺติ เอเกกสฺมึ สกเฏ เทฺว เทฺว กตฺวา สหสฺสํ ภณฺฑิกํ พนฺธิตฺวา อยํ เต สกฏุตฺตารณภตีติ คีวายํ ลคฺเคสิ ฯ โส สหสฺสภณฺฑิกํ อาทาย มาตุ สนฺติกํ อคมาสิ ฯ คามทารกา กินฺนาเมตํ อยฺยิกากาฬสฺส คเลติ โพธิสตฺตสฺส สนฺติกํ คจฺฉนฺติ ฯ โส เตหิ อนุพนฺธิโต ทูรโต ปลายนฺโต มาตุ สนฺติกํ คโต ปญฺจนฺนํ ปน สกฏสตานํ อุตฺตาริตตฺตา รตฺเตหิ อกฺขีหิ กิลนฺตรูโป ปญฺญายิตฺถ ฯ อยฺยิกา ตสฺส คีวาย สหสฺสถวิกํ ทิสฺวา ตาต อิทํ กหํ ลทฺธนฺติ โคปาลทารเก ปุจฺฉิตฺวา ตมตฺถํ สุตฺวา ตาต กึ อหํ ตยา ลทฺธภติยา ชีวิตุกามา กึการณา เอวรูปํ ทุกฺขํ อนุโภสีติ วตฺวา โพธิสตฺตํ อุณฺโหทเกน นฺหาเปตฺวา สกลสรีรํ เตเลน มกฺเขตฺวา ปานียํ ปาเยตฺวา สปฺปายโภชนํ โภเชตฺวา ชีวิตปริโยสาเน สทฺธึ โพธิสตฺเตน ยถากมฺมงฺคตา ฯ