สตฺถาปิ น ภิกฺขเว ตถาคโต อิทาเนว อสมธุโร ปุพฺเพปิ อสมธุโรเยวาติ อิมํ ธมฺมเทสนํ อาหริตฺวา อนุสนฺธึ ฆเฏตฺวา อภิสมฺพุทฺโธ หุตฺวา อิมํ คาถมาห

ยโต ยโต ครุ ธุรํ ยโต คมฺภีรวตฺตนิ

ตทาสฺสุ กณฺหํ ยุญฺชนฺติ สฺวาสฺสุ ตํ วหเต ธุรนฺติ ฯ

ตตฺถ ยโต ยโต ครุ ธุรนฺติ ยสฺมึ ยสฺมึ ฐาเน ธุรํ ครุ ภาริยํ โหติ อญฺเญ พลิพทฺทา อุกฺขิปิตุํ น สกฺโกนฺติ ฯ ยโต คมฺภีรวตฺตนีติ วตฺตนฺติ เอตฺถาติ วตฺตนิ ฯ มคฺคสฺเสตํ นามํ ฯ ยสฺมึ ฐาเน อุทกจิกฺขลมหนฺตตาย วา วิสมจฺฉินฺนตฏภาเวน วา มคฺโค คมฺภีโร โหตีติ อตฺโถ ฯ ตทาสฺสุ กณฺหํ ยุญฺชนฺตีติ อสฺสูติ นิปาตมตฺตํ ฯ ตทา กณฺหํ ยุญฺชนฺตีติ อตฺโถ ฯ ยทา ธุรญฺจ ครุ โหติ มคฺโค จ คมฺภีโร ตทา อญฺเญ พลิพทฺเท อปเนตฺวา กณฺหเมว ยุญฺชนฺตีติ วุตฺตํ โหติ ฯ สฺวาสฺสุ ตํ วหเต ธุรนฺติ เอตฺถาปิ อสฺสูติ นิปาตมตฺตเมว ฯ โส ตํ ธุรํ วหตีติ อตฺโถ ฯ