น ปุตฺตมิจฺเฉ น ธนํ น รฏฺฐํ

สตญฺจ ธมฺโม จริโต ปุราโณ

อิจฺเจว ทาเน นิรโต มโน มมาติ ฯ

ตตฺถ นวาหนฺติ น เว อหํ ฯ ยสสาติ ทิพฺพสฺส วา มนุสสฺส วา ยสสฺส การณา ฯ น ปุตฺตมิจฺเฉติ อิมสฺส จกฺขุทานสฺส ผเลน เนวาหํ ปุตฺตํ อิจฺฉามิ น ธนํ น รฏฺฐํ อปิจ สตํ ปณฺฑิตานํ สพฺพญฺญุโพธิสตฺตานํ เอส อาจิณฺณสมาจิณฺโณ โปราณกมคฺโค ยทิทํ ปารมีปูรณํ นาม น หิ ปารมิโย อปูเรตฺวา โพธิปลฺลงฺเก โพธิสตฺโต สพฺพญฺญุตํ ปาปุณิตุํ สมตฺโถ นาม อตฺถิ อหญฺจ ปารมิโย ปูเรตฺวา พุทฺโธ ภวิตุกาโม ฯ อิจฺเจว ทาเน นิรโต มโน มมาติ อิมินา การเณน มม มโน ทาเนเยว นิรโตติ วทติ ฯ