ตสฺส จกฺขูนิ ปาทาสึ พฺราหฺมณสฺส วนิพฺพโต ฯ

ภิยฺโย มํ อาวิสิ ปีติ โสมนสฺสญฺจ นปฺปกํ

เอเตน สจฺจวชฺเชน ทุติยํ เม อุปปชฺชถาติ ฯ

ตตฺถ ยํ มนฺติ โย มํ ยาจติ ฯ โสติ โส จกฺขุวิกโล พฺราหฺมโณ เทหิ เม จกฺขุนฺติ ยาจิตุํ อาคโต ฯ วนิพฺพโตติ ยาจนฺตสฺส ฯ ภิยฺโย มํ อาวิสีติ พฺราหฺมณสฺส จกฺขูนิ ทตฺวา อนฺธกาลโต ปฏฺฐาย ตสฺมึ อนฺธกาเล ตถารูปํ เวทนํ อคเณตฺวา อโห สุทินฺนํ เม ทานนฺติ ปจฺจเวกฺขนฺตํ มํ ภิยฺโย อติเรกตรา ปีติ อาวิสิ มม หทยํ ปวิฏฺฐา โสมนสฺสญฺจ มม อปริมาณํ อุปฺปชฺชติ ฯ เอเตนาติ สเจ มม ตทา อนปฺปกํ ปีติโสมนสฺสํ อุปฺปนฺนํ สจฺจเมเวตํ มยา วุตฺตํ เอเตน เม สจฺจวจเนน ทุติยํปิ จกฺขุํ อุปฺปชฺชตูติ อาห ฯ