เอตํปิ ทิสฺวา สีวิโย เทถ ทานานิ ภุญฺชถ

ทตฺวา จ ภุตฺวา จ ยถานุภาวํ

อนินฺทิโต สคฺคมุเปติ ฐานนฺติ ฯ

ตตฺถ โกนีธาติ โก นุ อิธ ฯ อปิ วิสิฏฺฐนฺติ อุตฺตมํปิ สมานํ ฯ จาคมตฺตาติ จาคปฺปมาณโต อญฺโญ ปรมจกฺขุ นาม นตฺถิ ฯ อิธ ชีวิเตติ อิมสฺมึ ชีวโลเก ฯ อิธ ชีวิตนฺติปิ ปาโฐ ฯ อิมสฺมึ ชีวโลเก ชีวมานนฺติ อตฺโถ ฯ อมานุสินฺติ ทิพฺพจกฺขุ มยา ลทฺธํ อิมินา การเณน เวทิตพฺพเมตํ จาคโต อุตฺตมํ นาม นตฺถีติ ฯ เอตํปิ ทิสฺวาติ เอตํ มยา ลทฺธํ ทิพฺพจกฺขุํ ทิสฺวาปิ ฯ