อิติ อิมาหิ จตูหิ คาถาหิ ธมฺมํ เทเสตฺวา ตโต ปฏฺฐาย อนฺวฑฺฒมาสปณฺณรสอุโปสเถสุ มหาชนํ สนฺนิปาเตตฺวา นิจฺจํ อิมาหิ คาถาหิ ธมฺมํ เทเสสิ ฯ ตํ สุตฺวา มหาชโน ทานาทีนิ ปุญฺญานิ กตฺวา เทวโลกํ ปูเรนฺโตว อคมาสิ ฯ

สตฺถา อิมํ ธมฺมเทสนํ อาหริตฺวา เอวํ ภิกฺขเว โปราณกปณฺฑิตา พาหิรกทาเนน อสนฺตุฏฺฐา สมฺปตฺตยาจกานํ อตฺตโน จกฺขูนิ อุปฺปาเฏตฺวา อทํสูติ วตฺวา จตฺตาริ สจฺจานิ ปกาเสตฺวา ชาตกํ สโมธาเนสิ ตทา สีวิกเวชฺโช อานนฺโท อโหสิ สกฺโก อนุรุทฺโธ อโหสิ เสสปริสา พุทฺธปริสา สีวิราชา ปน อหเมวาติ ฯ

สีวิราชชาตกํ นิฏฺฐิตํ ฯ

ตติยํ ฯ