ปญฺญาชเวน สมฺปนฺนา สมฺโมทนฺติ ตโต ตโตติ ฯ

สตํ เอโก จ เม ปุตฺตา ธตรฏฺฐ มยา สุตา

เตสํ ตฺวํ กิจฺจมกฺขาหิ นาวรุชฺฌนฺติ เต วโจติ ฯ

ตตฺถ กุสลนฺติ อาโรคฺยํ ฯ อนามยนฺติ อิทํ ตสฺเสว เววจนํ ฯ ผีตนฺติ กจฺจิ เต อิทํ รฏฺฐํ ผีตํ สุภิกฺขํ ธมฺเมน จ นํ อนุสาสสีติ ปุจฺฉิ ฯ โทโสติ อปราโธ ฯ ฉายา ทกฺขิณโตริวาติ ยถา นาม ทกฺขิณทิสาภิมุขี ฉายา น วฑฺฒติ เอวํ เต กจฺจิ อมิตฺตา น วฑฺฒนฺตีติ วทติ ฯ สาทิสีติ ชาติโภคอติโคตฺตกุลปเทเสหิ สมานา เอวรูปา หิ อติจารินี น โหติ ฯ อสฺสวาติ วจนปฏิคฺคาหกา ฯ ปุตฺตรูปยสูเปตาติ ปุตฺเตหิ จ รูเปน จ ยเสน จ อุเปตา ฯ ปญฺญาชเวนาติ ปญฺญาเวเคน ปญฺญํ ชวาเปตฺวา ตานิ ตานิ กิจฺจานิ ปริจฺฉินฺทิตุํ สมตฺถาติ ปุจฺฉติ ฯ สมฺโมทนฺติ ตโต ตโตติ ยตฺถ ยตฺถ นิยุตฺตา โหนฺติ ตโต ตโต สมฺโมทนฺเตว ฯ มยา สุตาติ มยา วิสฺสุตา มํ หิ โลโก พหุปุตฺตราชาติ วทติ อิติ เต มํ นิสฺสาย วิสฺสุตา ปากฏา ชาตาติ มยา สุตา นาม โหนฺตีติ วทติ ฯ เตสํ ตฺวํ กิจฺจมกฺขาหีติ เตสํ มม ปุตฺตานํ อิทํ นาม กโรนฺตูติ ตฺวํ กิจฺจมกฺขาหิ ฯ นาวรุชฺฌนฺตีติ น เต วจนํ อวรุชฺฌนฺติ โอวาทํ เนสํ เทหีติ อธิปฺปาเยเนวมาห ฯ