น จนฺตรา ปาปโก อตฺถิ โรโค

อปฺปทุกฺขํ สุขเมว ภิยฺโย

อวีตราคา วิชหาม ชีวิตนฺติ ฯ

ตตฺถ มเยกรตฺตนฺติ มยํ เอกรตฺตํ ฯ วิปฺปวสิมฺหาติ วิปฺปยุตฺตา หุตฺวา วสิมฺหา ฯ อนุตปฺปมานาติ อนิจฺฉมานานํ น โน เอกรตฺโต อตีโต เอกรตฺตํ อนุจินฺตยมานา ฯ ปุน น เหสฺสตีติ ปุน น ภวิสฺสติ น คมิสฺสติ ฯ ธนํว นฏฺฐํ ปิตรญฺจ เปตนฺติ ธนํ วา นฏฺฐํ ปิตรํ วา มาตรํ วา เปตํ กาลกตํ นุโข ตุมฺเห จินฺตยมานา เกน การเณน ตํ เอกรตฺตํ วินาวาสํ อกปฺปยิตฺถ อิทํ เม อาจิกฺขถาติ ปุจฺฉติ ฯ ยมิมนฺติ ยํ อิมํ ฯ เสลกุลนฺติ ทฺวินฺนํ เสลกุลานํ อนฺตเร สนฺทมานํ ฯ วสฺสกาเลติ เอกสฺส เมฆสฺส อุฏฺฐาย วสฺสนกาเล อมฺหากํปิ อิมสฺมึ วนสณฺเฑ รตฺติวเสนปิ จรนฺตานํ เอโก เมโฆ อุฏฺฐหิ อถ เม ปิยสามิโก กินฺนโร มํ ปจฺฉโต อาคจฺฉตีติ มญฺญมาโน เอตํ นทึ อุตฺตรีติ อาห ฯ อหญฺจาติ อหํ ปเนตสฺส จ ปรตีรํ คตภาวํ อชานนฺตี สุปุปฺผิตานิ องฺโกลกาทีนิ ปุปฺผานิ โอจินามิ ฯ ตตฺถ สตฺตลิโยธิกญฺจาติ กุณฺฑลปุปฺผญฺจ สุวณฺณโยธิกญฺจ โอจินนฺตี ปน ปิโย จ เม มาลธารี ภวิสฺสติ อหญฺจ นํ มาลินี หุตฺวา อชฺฌุเปสฺสนฺติ อิมินา การเณน โอจินามิ ฯ อุทฺทาลกา ปาตลี สินฺธุวาริตาติ อิเมปิ มยา โอจิตาเยวาติ วทติ ฯ โอเจยฺยาติ โอจินิตฺวา ฯ อคฺคลุํ จนฺทนญฺจาติ กาฬาคลุญฺจ รตฺตจนฺทนญฺจ ฯ โรสิตงฺโคติ วิลิตฺตสรีโร ฯ โรสิตาติ วิลิตฺตา หุตฺวา ฯ อชฺฌุเปสฺสนฺติ สยเน อุปคมิสฺสามิ ฯ นุทํ สาเล สลเล กณฺณิกาเรติ เอตานิ มยา โอจินิตฺวา ตีเร ฐปิตานิ ปุปฺผานิ นุทนฺตํ หรนฺตํ ฯ สุทุตฺตราติ ตสฺสา หิ โอริมตีเร ฐิตกาเลเยว นทิยา อุทกํ อาคตํ ตํ ขณญฺเญว สุริโย อฏฺฐมิโต วิชฺชุลตา นิจฺฉรนฺติ กินฺนรา นาม อุทกภีรุกา โหนฺติ อิติ สา โอตริตุํ น วิสหิ เตนาห สายํ นที อาสิ มยา สุทุตฺตราติ ฯ สมฺปสฺสนฺตาติ วิชฺชุลตานิจฺฉรณกาเล ปสฺสนฺตา ฯ โรทามาติ อนฺธการกาเล อปสฺสนฺตา โรทาม วิชฺชุลตานิจฺฉรณกาเล ปสฺสนฺตา หสาม ฯ สมฺพรีติ รตฺติ ฯ จตุกฺกนฺติ ตุจฺฉํ ฯ อุตฺตริยานาติ อุตฺตริตฺวา ฯ ตีหูนกนฺติ ตีหิ อูนานิ สตฺตวสฺสสตานิ ฯ ยมิธ มยนฺติ ยํ กาลํ อิธ มยํ วิปฺปวสิมฺหา ฯ สา อิโต ตีหิ อูนานิ สตฺตวสฺสสตานิ โหนฺตีติ วทติ ฯ วสฺเสกิมนฺติ วสฺสํ เอกํ อิมํ ตุมฺหากํ เอกเมว วสฺสสตํ อิมํ ชีวิตนฺติ วทติ ฯ โกนีธาติ เอวํ ปริตฺตกชีวิเต โก นุ อิธ กนฺตาย วินา ภเวยฺย อยุตฺตํ วา ปิยภริยาย วินา ภวิตุนฺติ วทติ ฯ กีวตโก นูติ ราชา กินฺนริยา วจนํ สุตฺวา อิเมสํ อายุปฺปมาณํ ปุจฺฉิสฺสามิ นนฺติ จินฺเตตฺวา ตุมฺหากํ กิตฺตโก อายูติ ปุจฺฉติ ฯ อนุสฺสวาติ สเจ โว กสฺสจิ วทนฺตสฺส วา สุตํ มาตาปิตูนํ วุฑฺฒานํ มหลฺลกานํ สนฺติเก อาคโม อตฺถิ อถ เม ตโต อนุสฺสวา วุทฺธิโต อาคมา วา เอตํ อวิกมฺปมานา อกฺขาถ ฯ น จนฺตราติ อมฺหากํ วสฺสสหสฺสํ อายุ อนฺตรา จ โน ปาปโก ชีวิตนฺตรายกโร โรโคปิ นตฺถิ ฯ อวีตราคาติ อญฺญมญฺญํ อวิคตเปมาว หุตฺวา ฯ